ڕۆژی 3ی كانونی یەكەم

پارێزگای سلێمانی

-    ڕۆژی 3ی كانونی یەكەمی ساڵی 1101ی زایینی، (ئەبو عەلی مەنسور) وەكو دەهەمین خەلیفەی دەوڵەتی فاتیمی دەستنیشان كرا كە لە ماوەی حوكمڕانییەكەیدا هەوڵی زۆری دا بۆ فراوانكردنی دەسەڵاتی فاتیمییەكان.
-    ڕۆژی 3ی كانونی یەكەمی ساڵی 1586، بۆ یەكەمجار لە مێژوودا (تۆماس هێریوت) دەریاوان ‌و گەڕیدەی ئینگلیز لە خاكەكانی كۆڵۆمبیا لە ئەمریكای لاتین ڕووەكی پەتاتەی دۆزییەوە كە لە سەدەكانی ناوەڕاستدا وەكو شۆڕشێك وابوو بۆ زاڵبوون بەسەر برسێتیدا ‌و لە ئەوروپا جێگەی گەنم ‌و جۆی گرتەوە ‌و چەندین ملیۆن كەسی لە برسێتیی ‌و هەڕەشەی مردن ڕزگار كرد.
-    بەرەبەیانی ڕۆژی 3ی كانونی یەكەمی ساڵی 1621، (گالیلۆ گالیلی) زانای بواری گەردوونناسی مژدەی سەركەوتنێكی گەورەی لە زانستی گەردووننسایدا ڕاگەیان د‌و ئاشكرایكرد كە یەكەم تەلسكۆبی دروست كردووە.
-    ڕۆژی 3ی كانونی یەكەمی ساڵی 1914، لەلایەن دەسەڵاتدارانی عوسمانییەوە شێخ عەبدولسەلام بارزانی ‌و دوو سەركردەی ڕێكانییەكان بە تۆمەتی دژایەتیكردنی بنەماكانی دەوڵەتی عوسمانی لە سێدارە دران.
-    ڕۆژی 3ی كانونی یەكەمی ساڵی 1922، یەكەم فیلمی سینەمایی بە وێنەی ڕەنگاوڕەنگ لە هۆڵەكانی سینەمای شاری نییویۆركی ئەمریكیدا نمایش كرا یەكەم فیلمیش كە بە شێوەی ڕەنگاوڕەنگ وێنە گیرابوو فیلمی (چیرۆكی دەریا) بوو.
-    دوای هێرشە سێقۆڵییەكەی (بەریتانیا ‌و فەرەنسا ‌و ئیسرائیل) بۆ سەر خاكی میسر، ڕۆژی 3ی كانونی یەكەمی ساڵی 1956، دوایین كاروانی سوپا هاوبەشەكەی ئەو سێ‌ وڵاتە بەندەرەكانی میسریان بەجێهێشت.
-    بە هۆی بەردەوامبوونی جەنگە خوێناوییەكان ‌و جینۆساید ‌و تاوانی دژ بە مرۆڤایەتی، ڕۆژی 3ی كانونی یەكەمی ساڵی 1973، ڕێكخراوی نەتەوەیەكگرتووەكان بڕیاریدا هەموو ئەو كەسانە لە دادگای نێودەوڵەتیدا سزا بدرێن كە ئەو تاوانانە ئەنجام دەدەن.
-    ڕۆژی 3ی كانونی یەكەمی ساڵی 1981، (داڤید ڤیا) یاریزانی هەڵبژاردەی تۆپی پێی ئیسپانیا لە دایك بووە، كە بەشداریی لە چەندین پاڵەوانێتیدا كردوە ‌و لەگەڵ هەڵبژاردەی وڵاتەكەی ‌و ئەو یانانەی یاریی تێدا كردوون چەندین نازناویان بەدەست هێناوە.
-    ڕۆژی 3ی كانونی یەكەمی ساڵی 1983، گفتوگۆ لە نێوان یەكێتیی نیشتمانیی كوردستان ‌و حكومەتی عێراقدا دەستی پێكرد كە بە مفاوەزات ناسراوە بەڵام دوای سەردانی چەندین وەفدی كورد بۆ بەغداد ‌و بە پێچەوانەوە، هەرچەندە ڕژێمی بەعس بەڵێنی دابوو ماف بە گەلی كورد لە باشوری كوردستان بدات، بەڵام لە هەموو بەڵێنەكان پاشگەز بووەوە ‌و گفتوگۆكان شكستیان هێنا.
-    ڕۆژی 3ی كانونی یەكەمی ساڵی 1992، ئەنجومەنی ئاسایشی نێودەوڵەتی بڕیاریدا هێزی سەربازیی نێودەوڵەتی ڕەوانەی سۆماڵا بكرێت بە مەبەستی كۆتاییهێنان بەو جەنگە ناوخۆییەی كە بە هۆی هەڵوەشانەوەی حكومەتی مەقادیشۆوە هەڵگیرسابوو.
-    ڕۆژی 3ی كانونی یەكەمی ساڵی 1992، كۆمەڵی گشتیی ڕێكخراوی نەتەوەیەكگرتووەكان بە تێكڕای دەنگی ئەندامەكانی بڕیاریدا ڕۆژی 3ی كانونی یەكەمی هەموو ساڵێك بكرێتە ڕۆژی جیهانیی خاوەن پێداویستییە تایبەتەكان ‌و بۆنەی تایبەت بۆ رێزگرتن لە خاوەنی پێداویستییەكان بەڕێوەبچن.
-    ڕۆژی 3ی كانونی یەكەمی ساڵی 2001، وەزارەتی دەرەوەی سوید داوای لە ڕێكخراوی نەتەوەیەكگرتووەكان كرد پارێزگاریی لە كوردانی باشوری كوردستان بكات ‌و لە هەر مەترسییەكی ناوخۆیی عێراق بیانپارێزێت.
-    ڕۆژی 3ی كانونی یەكەمی ساڵی 2004، (ئیبراهیم جەعفەری) جێگری پێشووتری سەرۆك كۆماری كاتیی عێراق ڕایگەیاند كە سەرۆكایەتیی كۆمار داوایەكی حكومەتی توركیای ڕەتكردووەتەوە بۆ هاوكاریكردنی سوپای توركیا لە دژی پارتی كرێكارانی كوردستان.
-    ڕۆژی 3ی كانونی یەكەمی ساڵی 2009، هونەرمەند ‌و ئەكتەری ناوداری كوەیتی (جاسم سالح) كۆچی دوایی كردووە كە لە ماوەی ژیانیدا بەشداریی لە چەندین بەرهەمی هونەریدا كردووە.
-    ئەمڕۆ لە جیهاندا بە ڕۆژی خاوەن پێداویستییە تایبەتەكان ناسراوە ‌و چەندین بۆنە ‌و مەراسیمی تایبەت بەو بوارە لە جیهاندا ڕێكدەخرێن بە ئامانجی هۆشیاركردنەوەی خەڵك بەرامبەر بەو كەسانەی كە خاوەن پێداویستیی تایبەتن، ساڵانەش نەتەوەیەكگرتووەكان بابەتێكی تایبەت بە خاوەن پێداویستییە تایبەتەكان هەڵدەبژێرێت ‌و دەیكاتە دروشم.