ئەگەر پەتای كۆلێرا بەخێرایی چارەسەر نەكرێت، مەترسی لەسەر ژیانی كەسی تووشبوو دروست دەبێت، بەڵام ئەگەر كەسی تووشبوو بە زوویی چارەسەر بكرێت، ئەوا پەتاكە مەترسیدار نییە ‌و بە ئاسانی چارەسەر دەكرێت.
بەگوێرەی راگەیەنراوێكی بەڕێوەبەرایەتیی گشتیی تەندروستیی سلێمانی، پێویستە بە زوویی كەسانی گومانلێكراو و تووشبوو بگەیەنرێنە نەخۆشخانە ‌و چارەسەریان بۆ بكرێت.
ئەمەی خوارەوە چەند رێنماییەكن سەبارەت بە پەتاكە ‌و مەترسییەكانی ‌و چۆنێتیی چارەسەركردن:
هەرچەندە كۆلێرا نەخۆشییەكی ترسناكە، بەڵام لە هەمان كاتدا نەخۆشییەكە كە چارەسەركردنی ئاسانە و زۆربەی نەخۆشەكان بەبەكارهێنانی (مغەزی) و چارەسەری پێویست زوو چاك ئەبنەوە و هیچ كێشەیەكی تەندروستییان بۆ دروست نابێت.
مەترسییەكانی تووشبوون:
ئەو كەسانەی كە تووشی سكچوونێكی زۆر ئەبن، بەتایبەتی ئەوانەی ڕشانەوەیان لەگەڵدایە، ئەوانەی نەخۆشیی شەكرە و سستیی گورچیلە و فشاری خوێن (زەخت)یان هەیە و كەسانی بەساڵاچوو و مناڵان مەترسییان زیاتر لەسەرە و پێویست ئەكات زوو سەردانی نەخۆشخانە بكەن بۆ وەرگرتنی چارەسەری پێویست، ئەگەرنا تووشی كێشەی گەورە دەبن، وەكو (وشكبونەوەی جەستە و شەكەتی و ماندووبونی زۆر، دابەزینی زەخت و شەكرەی خوێن و بورانەوە و لەهۆشخۆچوون،  سستبوون و لەكاركەوتنی گورچیلە، دابەزینی كانزاكان و خوێیەكانی لەش وەكو پۆتاسیۆم و سۆدیۆم و كالیسیۆم، ئەمانەش ئەبنە هۆی گرژبوون و ئیفلیجبونی ماسولكەكان و گەشكە و تێكچوونی كارەبایی دڵ و تەنانەت وەستانی دڵ.
چۆنێتیی خۆپاراستن:
فەرمانگە تەندروستییەكان ئاماژە بە چەند خاڵێكی گرنگ دەكەن بۆ خۆپاراستن لە تووشبوون بە سكچوون ‌و رشانەوە یاخود پەتای كۆلێرا.
یەكەم:  شووشتنی دەستەكان  بەئاو و سابون بە باشی، بەتایبەت دوای دەستلێدان لەو كەرەستانەی كە هاووڵاتی دڵنیانەبێت لە پاكییان.
دووەم: بەكارنەهێنانی ئەو بەروبوومانەی بەئاوی پیس ئاو دەدرێن.
سێهەم: شوشتنەوەی سەوزە و میوە بەباشی و بە ماددەی پەرمەنگەناتی پۆتاسیۆم.
چوارهەم:  بەكارنەهێنانی ئەو خواردن و خواردنەوانەی، كە هاووڵاتی دڵنیانەبێت لە پاكو خاوێنییان.
پێنجەم: دڵنیابوون لەسەرچاوەی ئاوی خواردنەوە و پاكڕاگرتنی.

بۆ زانیاریی زیاتر لە بارەی كار ‌و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن ‌و نوێترین هەواڵ ‌و زانیاریتان بەدەست بگات، بەم ئەدرەسانەی خوارەوە:

https://twitter.com/SlemaniGov

https://www.linkedin.com/company/30141235/admin/

https://www.facebook.com/slemanigov/

https://www.instagram.com/slemani_governorate/

https://www.youtube.com/channel/UCYh48iQHYPrIJdftytgLeqg?view_as=subscribe