لە سنوری پارێزگای سلێمانی، هەڵمەتێكی بەرفراوان دەستپێدەكات بە ئامانجی هۆشیاركردنەوەی هاووڵاتیان و رێگرتن لە ئالوودەبونی نەوجەوانان و مێردمنداڵان بە كێشانی نێرگەلە و ڤایپ.
بەرپرسانی ئیداریی و پەیوەندیدار و لیژنە هاوبەشەكانی قائیمقامیەتەكانی قەزای ناوەند و قەزاكانی دیكەی سنوری پارێزگای سلێمانی، هەڵمەتێكی فراوانیان دەستپێكردووە، بەئامانجی هۆشیاركردنەوەی گەنجان و كەسوكاری مێردمنداڵ و نەوجەوانان لە مەترسییەكانی بەكارهێنانی جگەرەی ئەلیكترۆنی (ڤایپ) و كێشانی نێرگەلە، هەر كافیتریا و رێستورانتێك یاخود شوێنێكی یاریكردنی بلیارد، رێگ بدرێت بە كەسانی خوار تەمەن 18 ساڵ سەردانیان بكات یاخود كار بكەن، لیژنەكان شوێنەكە دادەخەن و سزای توندی دەدەن.
بەپێی بڕیاری حكومەتی هەرێمی كوردستان و ڕێنماییەكان، ڕێگاپێدراونییە كەسانی خوار تەمەن 18 ساڵ لە كافیتریا و شوێنەكانی یاریكردنی بلیارددا كار بكەن، یان بەهەر هۆكارێك سەردانیان بكەن، چونكە كاریگەریی نەرێنی لەسەر كەسایەتیی و تەندروستیی جەستەییان دروست دەبێت.
ڕێكان جەمال سەرۆكی لیژنە هاوبەشەكانی قائیمقامیەتی سلێمانی ڕایگەیاند: لە ئەنجامی گەڕان و پپشكنینەكانیان بۆ كافیتریا و شوێنەكانی یاریكردنی بلیارد و شوێنە جیاوازەكانی فرۆشتنی جگەرەی ئاسایی و ئەلكترۆنی، چەندین شوێنیان داخستووە، بەهۆی سەرپێچیكردن و جێبەجێنەكردنی ڕێنماییەكان.
وتیشی: چاودێرییەكانیان بەردەوام دەبێ لەسەر ئەو جێگایانە و لە ئەگەری دووبارەكردنەوە یان جێبەجێنەكردنی ڕێنماییەكان، خاوەنی شوێنەكان تووشی سزای قورس دەبن.
بۆ هەمان مەبەست لە قائیمقامیەتەكانی سنوری پارێزگای سلێمانی، بەرپرسانی ئیداریی لەگەڵ هاووڵاتیان و لایەنە پەیوەندیدارەكان كۆدەبنەوە، بە ئامانجی هۆشیاركردنەوەی خەڵك و رێگرتن لە ئالوودەبونی مێردمنداڵان و نەوجەوانان بە نێرگەلەكێشان و ڤایپ، لیژنە هاوبەشەكانیش گەڕان و پشكنینەكانیان زیاتر كردووە بۆ سزادانی سەرپێچیكاران.
بۆ زانیاریی زیاتر لە بارەی كار و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن و نوێترین هەواڵ و زانیاریتان بەدەست بگات، بەم ئەدرەسانەی خوارەوە:
https://twitter.com/SlemaniGov
https://www.linkedin.com/company/30141235/admin/
https://www.facebook.com/slemanigov/