شاندی هاوبەشی پارێزگا و ئیدارە سەربەخۆكانی هەرێمی كوردستان، دوای ئەوەی بە ئامادەبوونی جێگری وەزیری دەرەوەی ئێران بۆ كاروباری عێراق و پارێزگاری ورمێ و نوێنەری لایەنە پەیوەندیدارەكان، لەگەڵ سەرۆك و ئەندامانی ژووری بازرگانیی و پیشەسازیی ورمێدا كۆبونەوە، گەڕانەوە هەرێمی كوردستان.
رۆژی چوارشەممە 31/5/2023 شاندێكی پارێزگا و ئیدارە سەربەخۆكانی هەرێمی كوردستان، كە پێكهاتبوون لە بەڕێزان پارێزگارەكانی هەولێر و سلێمانی و دهۆك و هەڵەبجە و سەرپەرشتیاری ئیدارە سەربەخۆكانی سۆران و ڕاپەڕین و گەرمیان و سەرۆك و بەڕێوەبەری گشتیی پەیوەندییەكان، لە فەرمانگەی پەیوەندییەكانی دەرەوەی حكومەتی هەرێمی كوردستان و ئەندامانی ژوورە بازرگانیی و پیشەسازییەكان و بەڕێوەبەر و نوێنەری فەرمانگە پەیوەندیدارەكان؛ بەسەردانێكی فەرمیی و لەسەر داوای كۆماری ئیسلامیی ئێران، گەیشتنە شاری ورمێ بۆ بەشداریكردن لە یەكەمین كۆبونەوەی نێوان پارێزگا سنورییەكانی نێوان ئێران و هەرێمی كوردستان.
لە رۆژی یەكەمی كۆبوونەوەكاندا پێنجشەممە 1/6/2023، شاندی هەرێمی كوردستان لەگەڵ وەزیری ناوخۆ و یاریدەدەری وەزیری دەرەوەی كۆماری ئیسلامیی ئێران بۆ كاروباری دبلۆماسییەتی ئابوریی و سەرۆكی لیژنەی كاروباری دەرەوەی پەرلەمانی ئێران و پەرلەمانتارانی ئەو وڵاتە و پارێزگارەكانی ورمێ و كوردستان و كرماشان و بەڕێوەبەری گشتیی گومرگەكانی ئێران و سەرۆك و ئەندامانی ژوورە بازرگانیی و پیشەسازییەكان كۆبونەوە.
د. هەڤاڵ ئەبوبەكر پارێزگاری سلێمانی، وتەی پارێزگای سلێمانیی پێشكەشكرد و داوایكرد هێزی لۆژیك بخرێتە پێش لۆژیكی هێز و ئابوریی و ئاسایشی ناوچەكە بپارێزرێت و كاری هاوبەش بۆ چارەسەركردنی گرفتی دەروازە و مەرزەكان و ئاو و مادەهۆشبەرەكان و خوێندكارانی هەرێمی كوردستان لە زانكۆكانی ئێران و هاتوچۆ و خزمەتگوزاریی گەشتیاران بكرێت، پەیوەندییە كولتوریی و زانستیی و بازرگانیی و گەشتیاریی و ئابورییەكان بەهێز بكرێن.
دواتر پارێزگاری سلێمانی، لە شاری ورمێ، لەگەڵ پارێزگارانی كرماشان و كوردستان و وەفدی هاوبەشی هەردوولادا كۆبوەوە، لە میانی كۆبوونەوەكاندا چەندین بابەتی بازرگانیی و گەشتیاریی و پیشەسازیی تاووتوێ كران، بە ئامانجی پتەوكردنی پەیوەندییەكان و كارئاسانی بۆ خزمەتكردنی هاووڵاتیان و گەشتیار و بازرگانەكانی نێوان هەردوولا، دواتریش شاندی هەرێمی كوردستان بە هاوڕێیەتیی پارێزگاری ورمێ و لایەنە پەیوەندیدارەكان؛ چەند پڕۆژە و دامەزراوەیەكی پارێزگاكەیان بەسەركردەوە و رۆژی هەینی 2/6/2023 لە رێوڕەسمێكی شایستەدا شاندی هەرێم لە دەروازەی نێودەوڵەتیی حاجی ئۆمەرانەوە، گەڕانەوە هەرێمی كوردستان، پارێزگاری سلێمانی سوپاسی بەڕێوەبەران و ستافی دەروازەكەی كرد، بۆ ئەو خزمەتەی پێشكەشیان كردووە.
بۆ زانیاریی زیاتر لە بارەی كار و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن و نوێترین هەواڵ و زانیاریتان بەدەست بگات، بەم ئەدرەسانەی خوارەوە:
https://twitter.com/SlemaniGov
https://www.linkedin.com/company/30141235/admin/
https://www.facebook.com/slemanigov/