دوای هەفتەیەك كنە و پشكنین، تیمێكی هاوبەشی شوێنەواری سلێمانی و زانكۆی چوبۆ، شوێنەوارێكی گرنگیان لە گردی یاسین تەپەی سنوری ناحیەی تانجەرۆ دۆزییەوە، كە مێژووەكەی دەگەڕێتەوە بۆ زیاتر لە (2500) دوو هەزار و پێنجسەد ساڵ پێش زایین.
كاری كنە و پشكنین لە شوێنەوارەكەدا، بە هاوبەشیی هەردوو شوێنەوارناس و شارەزایانی بەڕێوەبەرایەتیی شوێنەواری سلێمانی و تیمی زانكۆی چوبۆی ژاپۆنیی بەسەرۆكایەتیی پڕۆفیسۆر (شین نیشیاما) بەڕێوەدەچێت.
د. هەڤاڵ ئەبوبەكر پارێزگاری سلێمانی ئاماژەی بەوە كرد، كاركردنی تیمەكان لە ماوەی هەفتەیەكدا، بەرهەمی زۆر باشی هەبووە و شتی دەگمەن و گرنگ لە شوێنەوارەكەدا دۆزراونەتەوە كە هاوشێوەیان لە عێراق و كوردستاندا نییە.
مێژووی شوێنەوارەكە لە سەردەمی چاخی بەردینی نوێوە دەست پێدەكات تا سەردەمی ئیسلامیی، كە تێیدا پاشماوەی بیناو كۆڵان و شوێنی ناشتنی مردووان دەركەوتووە.
پارێزگاری سلێمانی سوپاسی بەڕێوەبەرێتیی شوێنەواری سلێمانی و تیمی زانكۆی چوبۆی ژاپۆنیی كردووە و پشتیوانیی پارێزگاشی بۆ دووپاتكردوونەتەوە و هیوای سەركەوتنی بۆ خواستوون.
بۆ زانیاریی زیاتر لە بارەی كار و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن و نوێترین هەواڵ و زانیاریتان بەدەست بگات، بەم ئەدرەسانەی خوارەوە:
https://twitter.com/SlemaniGov
https://www.linkedin.com/company/30141235/admin/
https://www.facebook.com/slemanigov/