له‌ سلێمانی ده‌ست به‌سه‌ر زیاتر له‌ 3 تۆن خواردن و مه‌وادی ماوه‌ به‌سه‌رچوودا ده‌گیرێت

پارێزگای سلێمانی

لیژنه‌ هاوبه‌شه‌كانی قائیمقامیه‌تی سلێمانی ده‌ست به‌سه‌ر بڕێكی زۆر خواردن و مه‌وادی ماوه‌ به‌سه‌رچوودا ده‌گیرێت و خاوه‌نه‌كانیشی ڕووبه‌ڕووی سزای یاسایی ده‌كاته‌وه‌.

له‌ ماوه‌ی چه‌ند ڕۆژی ڕابردوودا و له‌ ئه‌نجامی گه‌ڕان و به‌دواداچوونه‌كانی لیژنه‌ هاوبه‌شكان بۆ ڕێگری كردن له‌ مه‌واد و خواردنی به‌سه‌رچوو ده‌ست به‌سه‌ر زیاتر له‌ 3 تۆن خواردن و مه‌وادی ماوه‌ به‌سه‌رچوودا گیرا.

ئازاد نه‌بی نوێنه‌ری ته‌ندروستی و ئه‌ندامی لیژنه‌ی باڵا له‌ لیژنه‌ هاوبه‌شه‌كانی قائیمقامیه‌تی سلێمانی ڕایگه‌یاند له‌ چه‌ند ڕۆژی ڕابردوودا له‌ عه‌لوه‌ی سلێمانی ده‌ست به‌سه‌ر 2 تۆن زه‌یتون دا گیرا كه‌ پاش ئه‌وه‌ی دوو جار پشكنینی بۆ كرا ده‌ركه‌وت شیاو نیه‌ بۆ خواردن ، ووتیشی له‌ چه‌ند شوێنێكی تری شاری سلێمانی و له‌ ئه‌نجامی گه‌ڕان و به‌دواداچوونه‌كانیان توانیان ده‌ست بگرن به‌سه‌ر بڕێكی خواردن و مه‌وادی به‌سه‌رچوو كه‌ له‌ نێوایانیاندا بڕێكی زۆر ماستی تێدابوو كه‌ ئه‌ویش پاش پشكنین ده‌ركه‌وت گونجاو نیه‌ بۆ خواردن.

ئازاد نه‌بی ڕایگه‌یاند: هه‌موو ئه‌و مه‌وادانه‌ی ده‌ستیان به‌سه‌ردا گیراوه‌ له‌ ناوچه‌ی تانجه‌ڕۆ له‌لایه‌ن لیژنه‌ی له‌ناوبردنه‌وه‌ له‌ناوبراوه‌ وه‌ بۆ پاراستنی ته‌ندروستی هاووڵاتیان لیژنه‌ هاوبه‌شه‌كان هه‌وڵه‌كانیان چڕكردۆته‌وه‌، داواشی كرد له‌ هاووڵاتیان له‌ هه‌ر شوێنێك گومان له‌ بوونی خواردن و مه‌وادی به‌سه‌رچوو ده‌كه‌ن لیژنه‌كان ئاگادار بكه‌نه‌وه‌.