به هۆی ئازاردان و بێزاركردنی هاوڵاتیان به ته‌قه‌مه‌نی و یارییه ئاگرینه‌كان له‌لایه‌ن به‌كارهێنه‌ره‌كانیانه‌وه به‌ڕێوه‌به‌ری به‌شی پۆلیسی ڕێكاری ڕایده‌گه‌یه‌نێت له هه‌ر شوێن و دوكانێكدا ته‌قه‌مه‌نی و یارییه ئاگرینه‌كان بفرۆشرێت خاوه‌نه‌كه‌ی ده‌ستگیر ده‌كرێت و ڕووبه‌ڕووی یاسای ده‌كه‌نه‌وه.
رائید ابراهیم توفیق به‌ڕێوه‌به‌ری پۆلیسی ڕیكاری ووتی: بۆ ده‌ربڕینی خۆشحاڵیان له بۆنه‌كاندا مێرد مناڵان بڕێكی زۆر ته‌قه‌مه‌نی و یارییه ئاگرینه‌كان به‌كارده‌هێنن كه ئه‌مه‌ش هاوڵاتیانی بێزار كردووه هه‌روه‌ها مه‌ترسی ته‌ندروستی زۆری لێده‌كه‌وێته‌وه، له ئه‌نجامی به‌ركه‌وتنیان به یارییه ئاگرینه‌كان ساڵانه هاوڵاتیه‌كی زۆر ڕه‌وانه‌ی نه‌خۆشخانه‌كان ده‌كرێن.
رائید أبراهیم توفیق ووتیشی: سكاڵایه‌كی زۆری هاوڵاتیانمان به ده‌ست گه‌یشتووه بۆ كۆنتڕۆڵكردنی یارییه ئاگرینه‌كان ، له لایه‌ن به‌شه‌كه‌مانه‌وه بڕێكی زۆر ته‌قه‌مه‌نی و یارییه ئاگرینه‌كان ده‌ستی به‌سه‌ردا گیراوه و ڕه‌وانه‌ی لایه‌نی په‌یوه‌ندیدار ده‌كرێت بۆ له‌ناوبردنی.
به‌ڕێوه‌به‌ری پۆلیسی ڕێكاری ئاماژه‌ی بۆ ئه‌وه كرد كه ته‌قه‌مه‌نی و یارییه ئاگرینه‌كان له هه‌ر شوێن و دوكانێكدا هه‌بێت یان بفرۆشرێت ده‌ستی به‌سه‌ردا ده‌گرین و خاوه‌نه‌كه‌ی ڕووبه‌ڕووی سزای یاسایی ده‌كه‌ینه‌وه.
ده‌رباره‌ی هاوكاریكردنی پۆلیسی ڕێكاری بۆ نه‌فرۆشتنی ته‌قه‌مه‌نی و یارییه ئاگرینه‌كان له دوكان و بازاڕه‌كان ، گۆران قادر سه‌رۆكی لیژنه هاوبه‌شه‌كانی قائیمقامیه‌تی سلێمانی ووتی: لیژنه هاوبه‌شه‌كان هاوكاری ته‌واوی كۆنتڕؤڵكردن و بنه‌بڕكردنی فرۆشتنی ته‌قه‌مه‌نی و یارییه ئاگرینه‌كانه بۆیه له هه‌ر دوكانێك ته‌قه‌مه‌نی و یارییه ئاگرینه‌كان بفڕۆشرێت لیژنه هاوبه‌شه‌كانمان ده‌ستی به‌سه‌ردا ده‌گرێت و پۆلیسی لێ ئاگادار ده‌كه‌نه‌وه.