لیژنه هاوبه‌شه‌كانی قائیمقامیه‌تی سلێمانی له مانگی ڕه‌مه‌زاندا سه‌ردان و پشكنینه‌كانیان چڕكردۆته‌وه و له دواین هه‌ڵمه‌تیاندا به‌هۆی پابه‌ندنه‌بوونیان ژماره‌یه‌ك شوێن ڕووبوڕوویی سزای یاسایی كراونه‌ته‌وه ، سه‌رۆكی لیژنه‌كه‌ش ئاماژه به‌وه ده‌كات بۆ پارێزگاری كردن له مافی گشتی و ته‌ندروستی هاووڵاتیان هه‌ر شوێنێك پابه‌ند نه‌بێت به جێبه‌جێكردنی مه‌رج و ڕێنماییه‌كانه‌وه لێپرسینه‌وه‌ی له‌گه‌ڵدا ده‌كرێت،
گۆران قادر سه‌رۆكی لیژنه هاوبه‌شه‌كانی قایمقامیه‌تی سلێمانی " ڕایگه‌یاند لیژنه‌كان به به‌رده‌وامی له ئه‌ركدان بۆ دڵنیابوونه‌وه له جۆر و كوالێتی ئه‌و خواردن و پێداویستیانه‌ی له بازاڕه‌كانی سلێمانی ده‌فرۆشرێت ، جه‌ختیشی كرده‌وه به هۆی ئه‌وه‌ی له مانگی ڕه‌مه‌زاندا خواست له كاڵا و شت و مه‌ك زیاتره سه‌ردان و به‌دواداچوونه‌كانیان چڕكردۆته‌وه و به به‌رده‌وامی لیژنه‌كان له شه‌و ڕۆژدا سه‌ردانی بازاڕ و شوینه گشتیه‌كان ده‌كات له هه‌ر شوێنێك كه‌م و كورتی هه‌بێت لێپرسینه‌وه ده‌كرێت،
سه‌رۆكی لیژنه هاوبه‌شه‌كه‌ی قایمقامیه‌ت ووتیشی، له دواین سه‌ردان و به‌دواداچوونیان بۆ ناو بازاڕی شاری سلێمانی زیاتر له 50 شوێنیان به‌سه‌ركردۆته‌وه و به‌دواددچوونیان بۆ مه‌رج و ڕێنماییه‌كان كردووه له ئه‌نجامدا ژماره‌یه‌ك شوێن به هۆی بوونی كه‌م و كورتی پسوله‌ی ئاگادار كرنه‌وه‌یان بۆ كراوه‌و سی شوێنیش به‌هۆی پابه‌ن نه‌بوونیان داخراون ، روونیشی كرده‌وه به‌مه‌ستی پارێزگاری كردن له مافی گشتی و ته‌ندروستی هاووڵاتیان سه‌ردان و به‌دواداچوونه‌كانیان به‌رده‌وام ده‌بێت و هه‌ر شوێنیكیش پابه‌ند نه‌بێت به جێبه‌جیكردنی مه‌رج و ڕێنماییه‌كانه‌وه لێپرسینه‌وه‌ی له‌گه‌ڵدا ده‌كرێت.