لیژنە هاوبەشەكانی قائیمقامییەت لە سنوری شاری سلێمانی سەردانی ژمارەیەك لە وێستەگەی سوتەمەنی و عەمبارەكانی هەڵگرتنی سوتەمەنی دەكەن و رێنمایی پێویستیان پێدەدەن.
لە درێژە كارو چالاكییە بەردەوامەكانی لیژنە هاوبەشەكانی قائیمقامییەتی سلێمانی و لە پێناو پاراستنی سەلامەتی و گیانی هاوڵاتیان، لیژنەی باڵا لەشاری سلێمانی ژمارەیەك سەردانیان بۆ عەمبار و وێستگەكانی سوتەمەنی ئەنجام دا، لەو سەردانەشدا رێنمایی پێویستیان پێدان كه تایبەت بوون بە سەلامەتی و كوالیتی بەنزین، و داواش لە خاوەنی وێستگەكان كرا رەچاوی بەرژەوەندی هاوڵاتیان بكەن.
گۆران قادر، سەرۆكی لیژنە هاوبەشەكانی قائیمقامییەت رایگەیاند: لە ماوەی رابردوودا سەردانی چەند عەمبار و وێستگەیەكی سوتەمەنیمان كردووە و ئاگادارمانكردوونەتەوە كە پابەندی مەرج و رینماییەكان بن، و لە كاتی لادان لە رێنماییەكان رووبەرووی سزای یاسیای دەكرێنەوە.
سەرۆكی لیژنە هاوبەشەكان لە بارەی پێدانی رێنمایی زانیاری زیاتری خستەروو ، ووتی: بە پێی رێنماییەكان كاری تێكەڵكردنی بەنزین قەدەغەیە و كواڵتی بەنزین دائەبەزێنێت، و لە ئەگەری بەكارهێنانیشی دەبێتە هۆی پیسبوونی ژینگەو زیانێكی زۆری بۆ تەندروستی دەبێت، ووتیشی خاوەنی وێستگەكان و عەمبارەكانی هەڵگرتنی سوتەمەنیمان ئاگاداركردۆتەوە كەوا پابەندبن بە رێنماییەكانی بەرگری شارستانییەوە.
لیژنە هاوبەشەكان بەردەوام چاودێریی شوێنەگشتییەكان دەكات و لە ننَوانیشیاندا وێستەگەكان و عەمبارەكانی سوتەمەنی و ئامانجیشیان پاراستنی بەرژەوەندی هاوڵاتیانە.