ئەم كتێبخانەیە لەلایەن ئیدارەى ناوخۆى سلێمانى(ادارە محلى) لە 30/6/1943 دامەزراوە لەلایەن وەزارەتى مەعاریف(پەروەردەى ئێستا) و كتێبخانەكە سەر بە معاریفى سلێمانى بووە، دواتر لە سەرەتاى پەنجاكاندا بە ئیدارەى محەلییەوە بەسرایەوە. پیره‌مێردی شاعیر له رۆژنامه‌ی (ژین)دا بانگه‌وازی کردنه‌وه‌که‌ی بۆ کردووه. بۆ یه‌که‌مجاریش مامۆستا (أ، ب، هه‌وری)ی شاعیر کراوه به لێپرسراوی..
یەكەمجار شوێنەكەى لە سەر شەقامى سابونكەران لە خانووى عەلى بەگى فەتحولآ بەگدا بووە.دواتر گوازرایەوە بۆ خانوویەك لە نزیكى مزگەوتى گەورە.پاشان لەوێشەوە گوازرایەوە بۆ خانوونى مستەفا مەزهەر بەرامبەر مزگەوتى گەورە.پاشان جارێكى تر گوازرایەوە بۆ قوتابخانەى ناوەندى كۆن.بۆ جارى پێنجەم گوازرایەوە بۆ بینایەكى تایبەت بە خۆى كە لەسەردەمى پارێزگارى ئەوكاتەى سلێمانى (عومەر عەلى 1954-1957) دروست كرا، بەرامبەر مزگەوتى گەورەو تا ساڵى 1962 لەو شوێنە مایەوە.
بۆ جارى شەشەم و بۆ دواجار ساڵى 1962 گوازرایەوە بۆ شوێنى ئێستاى لە نزیك كارگەى جگەرەى سلێمانى و پاركى نالى و بەرامبەر سیتى سەنتەر لەسەر شەقامى سەرەكى سالم.
له‌گه‌ڵ گواستنه‌وه‌یدا ناوه‌که‌‌شی گۆڕاوه بۆ کتێبخانهی گشتیی سلێمانی‌و به (ئیداره‌‌ی مه‌حه‌للی)ییه‌وه لکێنراوه، که سه‌ر به وه‌زاره‌تی ناوخۆی عیراقی بووه. ئهو کاته بیناکه بریتی بوو له ئیداره‌یه‌‌کی بچووک‌و گه‌نجینه‌یه‌کی کتێبی عه‌ره‌بی‌و کوردی پێکه‌وه‌و له به‌رامبه‌ریدا هۆڵێک هه‌بوو بۆ خوێندنه‌وه. له به‌شی پشته‌وه‌یدا ژوورێکیش ته‌رخانکرابوو وه‌ک کتێبخانۆکه‌یه‌ک بۆ منداڵان. ئه‌مه بۆ قۆناغی ئهو سه‌رده‌مه بۆ شاری سلێمانی زۆر باش بوو.
تا کۆتایی‌ی ساڵی 1990 چه‌ند که‌ساتییه‌‌کی به‌ڕێزو ناوداری ئه‌م شاره ئه‌رکی لێپرسراوێتیی کتێبخانه‌که‌یان خراوه‌ته ئه‌ستۆ، وه‌ک: محه‌ره‌م محه‌مه‌د ئه‌میننی چیرۆکنووس، محه‌مه‌د ساڵح دیلانی شاعیر، عه‌بدولڵای که‌ریم عه‌لاف که‌سایه‌تی ناسراو.
له ده‌ستپێکی راپه‌ڕنه‌وه له ساڵی 1991دا ئه‌م کتێبخانه گشتییه به وه‌زاره‌تی رۆشنبیریی ههرێمی کوردستانه‌وه گرێدراوه. لێپراسراوێتییه‌که‌ی بۆ ماوه‌یه‌‌کی کاتی خراوه‌ته ئه‌ستۆی هونهرمهندی ناسراو یاسین قادر به‌رزنجی. پاشان خراوه‌ته ئه‌ستۆی هونهرمهندی شێوه‌کار عومه‌ر عوبێد عه‌بدولقادر، که نازناوی ئاری باباننه، که هه‌ڵگری بڕوانامه‌ی دیپلۆمه له زانستی کتێبخانه‌دا، که پێشتر له ساڵی 1977ه‌وه بووه به کارمه‌ندی کتێبخانهی زانکۆی سلێمانی.
له ساڵی 1996دا کتێبخانهی گشتیی سلێمانی فرمانی وه‌زاریی له لایه‌ن وه‌زاره‌تی رۆشنبیریی ههرێمی کوردستانه‌وه بۆ ده‌رکراوه بکرێته بهڕێوهبهرایهتیی کتێبخانه‌کانی شاری سلێمانی‌و شارۆچکه‌کانی. له ساڵی 2001ه‌وه به هاوکاریی حکومهتی ههرێمی کوردستان، کتێبخانهی گشتیی سلێمانی به مه‌به‌ستی نوێژه‌نکردنه‌وه‌ی له رووی بیناو که‌ره‌سه‌و کتێب‌و ئیداره‌وه ده‌ست به پڕۆسه‌‌ی فره‌وانکردنی کراوه له رێگای پڕۆژه تایبه‌تییه‌کانه‌وه‌و له ژێر چاودێریی راسته‌وخۆی به‌ڕێز دکتۆر به‌رهه‌م ئه‌حمه‌د ساڵح سه‌رۆکی پێشووتری حکومهتی ههرێمی کوردستان. هه‌روه‌ها به کۆمه‌کی راسته‌وخۆی به‌ڕێز مام جه‌لال‌و دارایی حکومهتی هه‌رێمیش له ساڵانی 2004ه‌وه ژماره‌یه‌کی زۆری کتێبی به‌نرخی بۆ خزمه‌تی خوێنه‌رانی بۆ دابین کراوه.
له دوای ئه‌وه بهڕێوهبهرایهتیی کتێبخانهی گشتیی سلێمانی لکێنراوه به بهڕێوهبهرایهتیی گشتیی کتێبخانه گشتییه‌کانی سلێمانییه‌وه، که له ساڵی 2003دا به فرمانی وه‌زاره‌تی رۆشنبیریی ههرێمی کوردستان دامه‌زراوه. هه‌ر له‌م ساڵانه‌ی دواییدا بهڕێوهبهرایهتیی کتێبخانهی گشتیی سلێمانی بووه به بهڕێوهبهرایهتیی کتێبخانه گشتییه‌کانی شاری سلێمانی‌و شارۆچکه‌کانی كه به تێکڕا به بینای کتێبخانهی گشتیی سلێمانییه‌وه ژماره‌یان بیست‌و دوو کتێبخانهی گشتییه و نزیکی (570) فه‌رمانبه‌ر به‌ڕێوه‌‌ی ده‌‌به‌ن.
ئێستا ته‌نیا كتێبخانه‌ی گشتی سلێمانی به ژماره‌ی ناونیشانی کتێبه‌کان له (100000) سه‌د هه‌زاری تێپه‌ڕی کردووه.