قایمقامیه‌تی سلێمانی ئاماری كارو چالاكیه‌كانی لیژنه هاوبه‌شه‌كانی قایمقامیه‌تی سلێمانی ساڵی 2015 بۆ ڕای گشتی بڵاوده‌كاته‌وه و قایمقامی سلێمانیش ڕایده‌گه‌یه‌نێت له ماوه‌ی ئه‌مساڵدا 50 كۆبوونه‌وه‌ی تایبه‌تمان سه‌باره‌ت به چه‌ند بابه‌تێكی په‌یوه‌ندیدار به ژیانی هاووڵاتیانه‌وه ئه‌نجامداوه .
به‌ختیار عبدارحمان قایمقامی سلێمانی له كۆنگره‌یه‌كی ڕۆژنامه‌وانیدا ئاماری كارو چالاكیه‌كانی لیژنه هاوبه‌شه‌كانی خسته‌ڕوو، وڕایگه‌یاند له‌م ساڵدا لیژنه‌كان 29194 سه‌ردانیان بۆ شوێنه گشتیه‌كان ئه‌نجامداوه و له كۆی ئه‌و سه‌ردانانه‌شدا پسوڵه‌ی سه‌رپێچی بۆ 2918 شوێن كراوه .
قایمقامی سلێمانی ئاماژه‌ی به‌وه‌شكرد ، لیژنه‌كانیان به ووردی چاودێری هه‌موو ئه‌و شوێنانه ده‌كه‌ن كه په‌یوه‌ندی به ژیانی ڕۆژانه‌ی هاووڵاتیانه‌وه هه‌یه و له كاتی سه‌رپێچیشدا ئاگادار ده‌كرێنه‌وه تاوه‌كو پابه‌ندی مه‌رج و ڕێنماییه‌كان ببن و ڕاشیگه‌یاند له‌م ساڵدا 298 شوێن ئاگاداركراونه‌ته‌وه و به‌هۆی پابه‌ندنه‌بوونه‌وه 136 شوێن داخراون و 18 شوێنیش ڕووبه‌ڕووی دادگا كراونه‌ته‌وه.
هه‌ر له كۆنگره‌كه‌دا ئه‌وه‌شی خسته‌ڕوو بڕی 372 تۆن و 598 كیلۆگرام كه‌لو په‌ل و مه‌وادی خراپبوو كه به هاوكاری ئاسایشی ئابووری و ده‌زگا و لایه‌نه په‌یوه‌ندیداره‌كان ده‌ستی به سه‌رداگیراوه و له‌لایه‌ن لیژنه هاوبه‌شه‌كانه‌وه سه‌رجه‌میان له ناوبراون و له 2015 دا لیژنه‌كان بڕی 217 ملیۆن و 141 هه‌زار و 500 دینار غه‌رامه‌ییان بۆ شوێنه گشتیه‌كان كردووه و به پێ ی یاسا و ڕێنماییه‌كان ئه‌و پاره‌ییه ده‌خرێته‌وه سه‌ردانی داهاتی گشتی .
له كۆتاییدا به‌ختیار عبدالرحمان ئاماژه‌ی به‌وه‌شكرد له‌م ساڵدا 50 كۆبوونه‌وه‌ی تایبه‌ت سه‌باره‌ت به چه‌ندین بابه‌تی په‌یوه‌ندیدار به ژیانی ڕۆژانه‌ی هاووڵاتیانه‌وه ئه‌نجامداوه و ئامانجمان خزمه‌تكردنی هاووڵاتیان شاری سلێمانی و ڕێگریكردنه له سه‌رپێچی و كاری نایاسایی .
