بەدواداچوونى مامەڵەكەت

ژمارەى نوسراوى پارێزگا

پن كۆد

سلێمانی لە مانگی ئەیلولدا


مێژوو پڕیەتی لە ڕووداو و پێشهاتی جۆراوجۆر كە كاریگەریی لە پاش خۆیان بەجێدەهێڵن، بۆیە تۆماركردنیان گرنگیی هەیە، سنوری سلێمانیش بەدەر نییە لە رووداوە مێژووییەكان، لە مانگی ئەیلولدا چەندین رووداو لە سنوری سلێمانی بە درێژایی مێژوو روویان داوە، بەشێكیان تۆمار كراون و بەشێكی دیكەشیان بە هۆی تۆمارنەكردنیانەوە ئێستا بەردەست نین.
ئەمانەی خوارەوە چەند رووداوێكن كە لە سلێمانی روویانداوە ‌و لە چەندین سەرچاوەی جۆراو جۆرەوە كۆكراونەتەوە، بە ئامانجی سوودگەیاندن:

-    رۆژی 1ی ئەیلولی  ساڵی 1986 هێزەكانی سوپای عێراق لە چەند قۆڵێكەوە هێرشێكی بەرفراوانیان بۆ سەر سەركردایەتی یەكێتیی نیشتمانیی كوردستان لەدۆڵی جافایەتی دەست پێكرد، بەڵام لەلایەن هێزی پێشمەرگەی كوردستانەوە زۆر بەتوندی وەڵام درانەوە ‌و هێرشەكە تێكشكێنرا، زیانێكی زۆری گیانیی ‌و ماڵییش لە هێزەكانی سەر بە رژێمی بەعس كەوت ‌و لە ناوچەكە پاشەكشەیان كرد.
-    لە درێژەی شەڕی (قەیوان - ماوەت) دا كە لە ناوچەی شارباژێڕی سەر بە پارێزگای سلێمانی بەڕێوەچوو، كە ماوەیەك بوو لە نێوان هێزی پێشمەرگەی كوردستان ‌و هێزە ئەمنییەكانی بەعس ‌و سوپای عێراق ‌و جاشەكاندا هەڵگیرسابوو، ڕۆژی 2ی ئەیلولی ساڵی 1986، هێزەكانی پێشمەرگەی هێرشێكی گەورەیان كردە سەر ناوچەی كارێزە ‌و دوای رووبەڕووبوونەوەیەكی سەختی چەند كاتژمێریی، سەرئەنجام هێزی پێشمەرگە سەركەوت و سنورەكەیان لە دەستی سوپای عێراق ڕزگار كرد، زیانی هێزەكانی عێراق چەندین كوژراو و بریندار بوو، جگە لەوەش چەندین ئۆتۆمبێل ‌و كەرەستەی سەربازی دەست پێشمەرگە كەوتن.
-    رۆژی 3 ی ئەیلولی ساڵی 1924 بەمەبەستی یارمەتیدانی شانشینی عێراق لە دژی شۆڕشەكەی شێخ مەحمودی حەفید، رژێمی شاهانەی ئێران بە 700 سەربازی سوارە و  300 سەربازی پیادەوە، هێرشی كردە سەر ناوچەكانی سنوری پشدەر، شۆڕشگێڕانی كوردیش زۆر بە توندی بەرەنگاریان بوونەوە، لەئەنجامی شەڕێكی سەختدا كە ژمارەیەكی زۆر لە هێزەكانی ئێران لەسەر دەستی شۆڕشگێڕان كوژران ‌و چەندینی دیكەشیان بریندار بوون ‌و ژمارەیەكیشیان لێ‌ بەدیل گیرا، هێزەكانی سەر بە رژێمی شای ئێران بە ناچاری لە ناوچەكە كشانەوە ‌و هەڵاتن بۆ دیوی ئێران.
-    رۆژی 3ی ئەیلولی ساڵی 1995، یەكەم ژمارەی گۆڤاری (ژنان) لە شاری سلێمانی بڵاوكرایەوە، كە تایبەت بوو بە داكۆكیركردن لە ماف ‌و داخوازییەكانی ڕەگەزی مێینە ‌و هەوڵدان بۆ یەكسانی لە نێوان هەردوو رەگەزدا، كە كۆمەڵێك نوسەری بە توانا ‌و روناكبیران ‌و چالاكوانانی بواری مافەكانی ژنان تێیاندا دەنووسی.
-    رۆژی 3 ی ئەیلولی ساڵی 1975 ( عەبدولقادر قڕگەیی) شاعیر لە شاری هەولێر كۆچی دوایی كرد، (عەبدولقادر محەمەد ئەحمەد) ساڵی 1898 لە شاری كەركوك لەدایك بووە، باوكی لە كاتی جەنگی یەكەمی جیهانیدا هاتوەتە شاری سلێمانی و كراوە بەئەندامی دادگای سلێمانی، عەبدولقادر قڕگەیی لە سلێمانی خوێندنی تەواو كردوە و پاشان بووە بە بەڕێوەبەری داهاتی سلێمانی، دواتر لە شارەكانی رومادی ‌و كەركوك و هەولێر كاری كردوە و  ساڵی 1958 خانەنشین كراوە، ئەو شاعیرە جگە لە شیعر چەندین چیرۆكی نوسیوە و  ناوەڕۆكی شیعرەكانی هۆشیاركردنەوەی میللەتی كورد و پشتگیری بوە لە داوا رەواكانی.
-    ڕۆژی 3ی ئەیلولی ساڵی 1987، لەلایەن فڕۆكە جەنگییەكانی سوپای عێراقەوە، ناوچەكانی (یاخسەمەر ‌و دۆڵی جافایەتی) لە سنوری پارێزگای سلێمانی، بە خەستی بە چەكی كیمیایی بۆردومان كران، بەو هۆیەشەوە چەندین هاوڵاتی سڤیل بەركەوتن بریندار بوون، دانیشتوانی سنورەكەش ناچار بوون، ماڵا ‌و حاڵی خۆیان بەجێبهێڵێن ‌و ئاوارەی ناو شاری سلێمانی ‌و گوندەكانی دەوروبەر بوون.
-    رۆژی 4 ی ئەیلولی ساڵی 1926  كاربەدەستانی شانشینی بەریتانیا لە عێراق لەگەڵ (شێخ مەحمودی حەفید) دەستیان بە دانوستان و گفتوگۆ كرد بۆ چارەسەركردنی كێشەكان، گفتوگۆكان لە شارۆچكەی خورماڵی سنوری هەڵەبجە ئەنجام درا ‌و دوای تاووتوێكردنی دۆخەكە بۆ ماوەی سێ‌ كاتژمێر، هەردوولا رێكەوتن لەسەر پاراستنی ئارامی ‌و راگرتنی هەر جۆرە رووبەڕووبوونەوەیەك.
-    رۆژی 4ی ئەیلولی ساڵی 1989، ڕێكخراوی (یەكێتیی مافپەروەرانی كوردستان) لەناوچەی زەڵێ‌ لە سنوری پشدەر ‌و بتوێنی سەر بە پارێزگای سلێمانی لەلایەن كۆمەڵێك یاساناس ‌و مافپەروەری شۆڕشگێڕەوە پێكهێنراوە، كە بۆ ماوەی دوو ڕۆژ دەستەی سەرۆكایەتی هەڵبژێردران ‌و پەیڕەوی ناوخۆ ‌و  كاروبارەكانی نوسرانەوە ‌و دەستی كرد بە چالاكی ‌و كاروباری یاسا، ڕێكخراوەكەش تایبەت بوو بەمافپەروەران.
-    رۆژی 4 ی ئەیلولی ساڵی  1993 ئەدیب و نوسەر ( جەلال تەقێ‌ ) كۆچی دوایی كردوە، كە ساڵی 1939 لە سلێمانی لەدایك بوە و قۆناغەكانی خوێندنی سەرەتایی و ناوەندی و ئامادەیی لە سلێمانی تەواو كردوە، بەهۆی ئەوەی كەسێكی زیرەك بوە و لە قۆناغی ئامادەییدا پلەی بەرزی بەدەست هێناوە ساڵی 1960 بۆ تەواوكردنی خوێندنی باڵا نێردراوە بۆ روسیا هەتا لە زانكۆی مۆسكۆ پسپۆڕی بەدەست بهێنێت، هەر بۆیە ساڵی 1967 كۆلێژی ئەندازەی بیناسازیی لە روسیا تەواو كردوە، لەو كاتەدا كە مامۆستا جەلال خوێندویەتی كچێكی روسیایی بەناوی (نینا) ناسیوە ‌و دوای ماوەیەك هاوسەرگیرییان كردوە، دوای تەواوكردنی خوێندنەكەشی لەگەڵیدا هاتوە بۆ باشوری كوردستان ‌و پێكەوەژیاون بەڵام هاوسەرەكەی زۆر نەژیاوە ‌و لە سەرەتای حەفتاكاندا كۆچی دوایی كردوە، مامۆستا جەلال تەقێ‌ لە بواری رێكخراوەییشدا كەسێكی لێهاتوو بوە ‌و ئەندامی چالاكی كۆمەڵەی خوێندكارانی كورد بوە لە ئەوروپا، هەروەها لەبواری ئەدەبیشدا گەلێك بابەتی چیرۆك و شانۆنامەی لە زمانی روسییەوە وەرگێڕاوەتە سەر زمانی كوردی.
-    رۆژی 5 ی ئەیلولی ساڵی 1922 پاش ئەوەی شێخ مەحمودی حەفید شۆڕشی لە دژی داگیركاری ئینگلیز بەرپا كرد ‌و شۆڕشگێڕانی كورد زەبری گەورەیان لە ئینگلیزەكان دا، هێزە سەربازییەكانی ئینگلیز لە شاری سلێمانی ‌و ناوچەكانی دەوروبەری كشـانەوە و شارەكەیان چۆڵ كرد، دەسەڵاتی ئیداری شاری سلێمانیش درایە دەست ئەنجومەنێك كە لەلایەن شێخ قادر بەرزنجییەوە سەرپەرشتیی دەكرا.
-    رۆژی 5 ی ئەیلولی ساڵی 2007  بەئامادەبوونی جەلال تاڵەبانی سەرۆك كۆماری عێراق ‌و بەبەشداریی بەرهەم ئەحمەد ساڵح جێگری سەرۆك وەزیرانی عێراق و ژمارەیەك لە وەزیرەكانی هەردوو حكومەتی هەرێمی كوردستان ‌و عێراق و ژمارەیەكی زۆر لە بەرپرسانی حزبی و حكومی ‌و بازرگانانی ناوخۆیی و بیانی، دوەم پیشانگەی نێودەوڵەتیی سلێمانی لەناوچەی تاسڵوجە كرایەوە، كە 200 كۆمپانیا لەبوارە جۆر بەجۆرەكاندا بەشدارییان تێدا كردبوو.
-    رۆژی 6 ی ئەیلولی ساڵی 1930 ژمارەیەكی زۆر لە دانیشتوانی شاری سلێمانی بەمەبەستی ناڕەزایی دەربڕین بەرامبەر بە هەڵنەبژاردنی نوێنەری راستەقینەی شاری سلێمانی بۆ ئەنجومەنی نیشتمانیی عێراق و پشتگوێخستنی مافەكانی گەلی كورد لە پەیماننامەی نێوان (عێراق ‌و بەریتانیا) دا، لە بەردەركی سەرای سلێمانی گرد بوونەوە ‌و چەندین دروشمیان دژی حكومەتی پاشایەتیی عێراق بەرزكردەوە، هێزە ئەمنییەكانی سەر دەوڵەتی عێراقیش بەدەستڕێژی گوللـە وەڵامی خەڵكیان دایەوە ‌و پێكدادان لە نێوان خۆپیشاندەران ‌و هێزە ئەمنییەكاندا دروست بوو، لە ئەنجامدا نزیكەی (45) هاوڵاتیی خۆپیشاندەر شەهید بوون و ( 195) كەسی تریش بریندار بوون، دواتر هێزە ئەمنییەكان دەستیان كرد بە پەلاماردانی خەڵكی ناوشار ‌و سەدان كەسیان دەستگیر كرد، كە یەكێك لە دەستگیركراوەكان مامۆستا فایەق بێكەسی شاعیر بوو، ئەو ڕۆژە لەمێژووی گەلی كورددا بە ڕۆژی ڕِەشی شەشی ئەیلول یاخود شەڕی بەردەركی سەرا ناسراوە.
-    رۆژی 6 ی ئەیلولی ساڵی 1966 (فەتحی)ی شاعیر  كۆچی دوایی كردوە، فەتحی كوڕی شێخ فەتاحی شێخ سمایلی دۆڵانە، ساڵی 1918 لە گوندی دۆڵانی ناوچەی قەرەداغی سەر بە پارێزگای سلێمانی لەدایك بووە، بەشیعر و هەڵبەست هاوبەشی گەلێك بۆنەی نیشتمانیی و نەتەوایەتیی كردوە و چەندین بابەتی لە زمانی فارسییەوە وەرگێڕاوەتە سەر زمانی كوردی.

-    رۆژی 6 ی ئەیلولی ساڵی 1979 (ئاسۆی دەلاك) لەلایەن رژێمی بەعسی روخاوەوە لەناو شاری  سلێمانی دەستگیر كرا، ئاسۆ دەلاك ناوی تەواوی (حەسیب عومەر سابر)ە ‌و ساڵی 1957  لە گەڕەكی (سەركارێز)ی شاری سلێمانی لەدایك بووە، ساڵی 1976 پەیوەندیی بە رێكخستنەكانی كۆمەڵەی رەنجدەرانی كوردستانەوە كردوە ‌و چەكی پێشمەرگایەتیی كردوەتە شان و لە هەرێمی (5)ی قەرەداغ بووە بە پێشمەرگە، ئاسۆی دەلاك بەهۆی جوامێریی و ئازایەتییەكەیەوە هەرزوو لەلای خەڵكی كوردستان و تەنانەت لەلای هێزە ئەمنییەكان و ئیستیخباراتی رژێمی بەعسەوە ناسرا ‌و ناوبانگی دەركرد، لە ماوەی خەباتكردنیدا چەندین چالاكیی كەموێنەی لەناو شاری سلێمانی و دەوروبەری ئەنجامداوە، رۆژی 6ی ئەیلولی ساڵی 1979 لەلایەن دامودەزگاكانی رژێمی بەعسەوە دەستگیر كرا، بەڵام رۆژ و شوێنی شەهیدبوونی نەزانراوە.
-    ڕۆژی 7ی ئەیلولی ساڵی 1991، پارتی سۆسیالستی كوردستان ناسراو بە (پاسۆك)، یەكەم كۆنگرەی خۆیی لە ناوچەی قەڵاچوالانی سەر بەپارێزگای سلێمانی سازكرد، كە ماوەی سێ‌ ڕۆژی خایاند.
-    رۆژی 8 ی ئەیلولی ساڵی 1992 ئەنجومەنی وەزیرانی حكومەتی هەرێمی كوردستان بڕیاری ژمارە ( 1227)ی دەركرد كە  تایبەت بوو بە گەڕانەوەی زانكۆی سلێمانی لە شاری هەولێرەوە بۆ شاری سلێمانی، ئەوەش دوای ئەوەی ساڵی 1982 زانكۆی سلێمانی بەبڕیارێكی رژێمی بەعس لەشاری سلێمانییەوە گواسترایەوە بۆ شاری هەولێر ‌و ناوەكەی گۆڕدرا بۆ زانكۆی سەڵاحەدین، خەڵكی شاری سلێمانی ‌و دڵسۆزان هاوكارییەكی زۆریان كرد بۆ سەرپێخستنەوەی زانكۆكە.
-    ڕۆژی 8ی ئەیلولی ساڵی 2002، پیشانگەیەكی گەورەی نێودەوڵەتیی كتێب، بەهاوكاریی كۆماری ئیسلامیی ئێران لە شاری سلێمانی كرایەوە، كە نزیكەی 100 دەزگای چاپ ‌و پەخش ‌و بڵاوكردنەوە بەشدارییان تێدا كردبوو هەزاران ناونیشانی لەخۆ دەگرت، پیشانگەكەش ماوەی چەند ڕۆژێك بەردەوام بوو.
-    ڕۆژی 9ی ئەیلولی ساڵی 1978، هێزەكانی سوپای عێراق هێرشێكی بەرفراوانیان كردە سەر گوندەكانی دەڤەری پشدەر بەمەبەستی ڕاگواستنیان بۆ ئۆردوگا زۆرەملێكان، بەڵام لەلایەن هێزی پێشمەرگەی كوردستانەوە بەتوندی بەرپەرچ درانەوە، كە بەهۆیەوە زیانەكانی سوپای عێراق دەیان كوژراو و بریندار بوون ‌و شاڵاوەكەش تێكشكێنرا.
-    رۆژی 10ی ئەیلولی ساڵی 1820، لەمیانی گەشتەكەیدا بۆ كوردستان، نوسەر ‌و مێژوونوس ‌و كوردناسی بەناوبانگ (كلۆدیۆس جەیمس ڕیچ)، پاش كۆكردنەوە ‌و نوسینەوەی چەندین بابەت ‌و بینینی چەند ناوچەیەك ‌و چەندین كەسایەتی لە خۆرهەڵاتی كوردستان، شاری بانەی بەجێهێشت ‌و گەڕایەوە بۆ شاری سلێمانی.
-    لەڕۆژێكی وەكو ئەمڕۆ‌و لەساڵی 1986دا، فڕۆكە جەنگییەكانی سوپای عێراق هێرشیان كردە سەر بنكە‌و بارەگاكانی هێزی پێشمەرگە لەناوچەی ماوەتی سەر بەپارێزگای سلێمانی، كە بەهۆیەوە دوو پێشمەرگە گیانیان لەدەستدا‌و نزیكەی 20ی تریش بریندار بوون، زیانی گیانی‌و ماڵیی زۆریشیان بەبنكەكانی پێشمەرگە گەیاند.
-    ڕۆژ 10ی ئەیلولی ساڵی 1986، فڕۆكە جەنگییەكانی سوپای عێراق هێرشیان كردە سەر بنكە ‌و بارەگاكانی هێزی پێشمەرگە لە ناوچەی ماوەتی سەر بەپارێزگای سلێمانی، كە بەهۆیەوە دوو پێشمەرگە گیانیان لەدەست دا‌و نزیكەی 20ی تریش بریندار بوون، زیانی گیانی‌و ماڵیی زۆریشیان بەبنكەكانی پێشمەرگە گەیاند.
-    رۆژی 11 ی ئەیلولی ساڵی 1937 یەكەم  ژمارەی  ڕۆژنامەی زبان لەلایەن  شارەوانی سلێمانییەوە  بڵاوكرایەوە، مامۆستا (ساڵح قەفتان) سەرنوسەری  رۆژنامەكە بوو، زبان رۆژنامەیەكی هەفتانەی شەش لاپەڕەیی بوو كە بە تیراژی (300 - 500) ژمارەی لێ‌ چاپ دەكرا ‌و بڵاودەكرایەوە، لەگەڵا بڵاوكردنەوەیدا ژمارەیەك لە رۆژنامەكە بۆ مەلیك مەحمود رەوانە دەكرا كە ئەو كاتە بۆ باشوری عیراق دوورخرابوەوە، هەروەها ژمارەیەكیش بۆ مێژوونوس ‌و كوردناسی گەورە (ڤلادیمێر مینۆرسكی) و شەش ژمارەش بۆ (ئەدمۆنز) دەنێردرا بۆ شاری بەغداد، رۆژنامەكە ماوەی چوار ساڵ بەردەوام بوو، دوایین ژمارەشی كە ژمارە (94) بوو لە (18 ی كانونی دوەمی ساڵی 1941)دا  بڵاوكرایەوە .
-    رۆژی 11ی ئەیلولی ساڵی 1961، هێزەكانی سوپای عێراق بەشێوەیەكی بەرفراوان هێرشیان كردە سەر ناوچە جیاجیاكانی باشوری كوردستان، كە بەهۆیەوە شۆڕشی ئەیلول بەرپا بوو، سەرەتای شۆڕشەكەش لە ناوچەی (بازیان)ی سەر بە پارێزگای سلێمانی دەستی پێكرد ‌و دواتر هەموو باشوری كوردستانی گرتەوە، كە لە ئەنجامدا زۆربەی ناوچەكانی باشور لە ژێر دەستی حكومەتی عێراق ڕزگار كران.
-    رۆژی 11ی ئەیلولی ساڵی 1986، هێزەكانی سوپای عێراق هێرشێكی بەرفراوانیان بۆ سەر ناوچەكانی (سارتكە ‌و كلكەسماق ‌و قۆپی شەیتان)ی سەر بە دۆڵی خەلەكان دەست پێكرد، بەڵام لەلایەن هێزی پێشمەرگەی كوردستانەوە بە توندی وەڵام درانەوە ‌و لە ئەنجامدا هێرشەكە تێكشكێنرا، زیانەكانی سوپای عێراقیش سەدان كوژراو و بریندار بوو.
-    رۆژی 11ی ئەیلولی ساڵی 1991 تەلەفیزۆنی گەلی كوردستان لە سلێمانی دامەزرا، كە دوای راپەڕین ‌و رزگاربونی باشوری كورستان لە دەست رژێمی بەعس یەكەم كەناڵی تەلەفزیۆنی كوردی بوو دەست بە پەخشكردن بكات، كردنەوەی پەخشی كەناڵەكەش بە وتارێكی جەلال تاڵەبانی دەستی پێكرد كە لە یاریگەی سلێمانی بەبۆنەی ساڵیادی شۆڕشی ئەیلولەوە پێشكەشی كرد، كەناڵەكە گرنگی بە تێكڕای لایەنەكانی ژیانی  كوردەواریی و سیاسی و ئابوری و فەرهەنگی و كەلتوری دەدا، كە دواتر و لە 1 ی حوزەیرانی ساڵی 2008دا كەناڵەكە پەخشی فراوانتر كرد ‌و كرا بە سەتەلایتی گەلی كوردستان.
-    ڕۆژی 11ی ئەیلولی ساڵی 2003، (پۆڵا برێمەر)ی حاكمی مەدەنیی ئەمریكا لە عێراق، گەیشتە شاری سلێمانی ‌و لەگەڵا بەرپرسانی كورددا چەند كۆبونەوە و دیدارێكی ئەنجامدا ‌و تاوتوێی چەند بابەتێكی سیاسییان كرد كە تایبەت بوون بە چۆنێتیی بەشداریی كورد لە دەسەڵاتی سیاسیی عێراقی دوای رژێمی بەعس ‌و ئامادەكاریی بۆ هەڵبژاردنە گشتییەكان.
-    رۆژی 12 ی ئەیلولی ساڵی 1920 شێخ مەحمودی حەفید كرا بە فەرمانڕەوای باشوری كوردستان، لە كۆبونەوەیەكی جەماوەریدا نوێنەری شانشینی بەریتانیا (میجەر نوئێل) ئەو دەسەڵاتەی شێخ مەحمودی راگەیاند، دواتر مەلیك مەحمود كابینەی حكومەتەكەی راگەیاند كە لە چەند وەزیرێك پێك هاتبوو، بەڵام  بەهۆی ئەوەی حكومەتەكەی مەلیك مەحمود لەگەڵ بەرژەوەندییەكانی ئینگلیزدا نەدەگونجا، هەرزوو كێشە لەنێوان حكومەتی كوردستان ‌و داگیركاری ئینگلیزدا سەریهەڵدا ‌و ئینگلیزەكان كەوتنە پیلانرێژی بۆ لەناوبردنی دەوڵەتی باشوری كوردستان ‌و دوای پێكدادان ‌و ململانێیەكی زۆر لەئەنجامدا كۆتاییان بە حكومەتەكەی مەلیك مەحمود هێنا.
-    رۆژی 13ی ئەیلولی ساڵی 1959، زانای ئایینی ئیسلام ‌و تێكۆشەر ‌و نوسەری ناوداری گەلی كورد ‌و شەرعزان، مامۆستا (محەمەد قزڵجی) كۆچی دوایی كردووە، كە لە ماوەی ژیانیدا چەندین زانای ئایینی پێگەیاندووە ‌و یەكێك بووە لەشەرعناس ‌و فەقیهەكانی ئایینی ئیسلام، مامۆستا محەمەد لە گوندی قزڵجەی سەر بە قەزای پێنجوێن لە دایك بوە ‌و بۆ دەستخستنی زانست چەندین ناوچەی كوردستان گەڕاوە ‌و لەسەر دەستی زانایانی ئایینیی ئەو سەردەمە خوێندوویەتی، دواتریش وەكو زانایەكی گەورە لە چەندین ناوچە وەكو پێشنوێژ ‌و وتارخوێن كاری كردوە، لە هەمان كاتدا دەستێكی باڵای هەبوە لە پێگەیاندنی مامۆستایانی ئایینیدا.
-    ڕۆژی 13ی ئەیلولی ساڵی 1978، یەكێك لە مەفرەزە سەرەتاییەكانی هێزی پێشمەرگەی كوردستان، لە ناوچەی (بەردەسپیان)ی سنوری ماوەتی سەر بە پارێزگای سلێمانی، هێرشی كردە سەر سەنگەرەكانی سوپای عێراق لەو ناوچەیەدا، كە بەهۆیەوە زیانێكی زۆری گیانی ‌و ماڵی بە سوپای عێراق گەیشت.
-    رۆژی 13 ی ئەیلولی ساڵی 1991 گۆڕێكی بەكۆمەڵ لە نزیك سەربازگەی (سارداو)ی شاری سلێمانی دۆزرایەوە، كە تەرمی (9) هاووڵاتی تێدا بوو، دوای لێكۆڵینەوە دەركەوت روفاتەكان كۆمەڵێك هاوڵاتی بوون كە لەلایەن  رژێمی بەعسەوە رۆژی 17 ی تشرینی یەكەمی ساڵی 1985 لەكاتی پشكنینی هێزە ئەمنییەكاندا كە بە (منع التجول) ناسراوە دەستگیر كرابوون ‌و دواتر شەهید كرابوون.
-    ڕۆژی 14ی ئەیلولی ساڵی 1899، (پیرەمێرد)ی شاعیری گەورەی كورد، لەسەر فەرمانی سوڵتان (عەبدولحەمید)ی سوڵتانی دەوڵەتی عوسمانی، كرایە ئەندامی ئەنجومەنی شاری ئیستانبوڵی توركیا، پیرەمێرد ماوەیەكی زۆر بوو لە توركیا نیشتەجێ‌ ببوو كە بە هۆی كارامەیی ‌و لێهاتووییەكانیەوە ببوە جێی سەرنجی بەرپرسانی دەوڵەتی عوسمانی، هەر بۆیە داوایان لێكرد بەشداریی بكات لە بەڕێوەبردنی ئەو شارەدا.
-    ڕۆژی 14ی ئەیلولی ساڵی 1922، یەكەم كۆنگرەی كوردی لە شاری سلێمانی ‌و لە سایەی حكومەتەكەی (شێخ مەحمودی حەفید)دا بەڕێوەچوو، كە تێیدا لایەنە كوردییەكان پشتیوانیی خۆیان بۆ مەلیكی كوردستان دەربڕی ‌و گفتوگۆكانیان دەست پێكرد بە ئامانجی دروستكردنی كۆدەنگی بۆ بەڕێوەبردنی دەوڵەتی كوردستان ‌و یەكخستنی هێزە چەكدارەكان لە پێناو پارێزگاریكردن لە خاكی كوردستان.
-    ڕۆژی 14ی ئەیلولی ساڵی 1987، لە درێژەی پیلانەكانی رژێمی بەعس بۆ كاولكردنی باشوری كوردستان فڕۆكە جەنگییەكانی سوپای عێراق بە چەكی كیمیایی بۆردومانی گوندەكانی دۆڵی (مێرگەپان)ی سەر بە پارێزگای سلێمانییان كرد، كە بە هۆیەوە ژمارەیەك هاوڵاتی بەركەوتن ‌و بەشێكی زۆری دانیشتوانی گوندەكانیش ناچار بوون شوێنی خۆیان بەجێبهێڵن ‌و روویان كردە ناوچەكانی دەوروبەر ‌و ناو شاری سلێمانی.
-    شەوی 14 لەسەر 15ی ئەیلولی ساڵی 1993، تۆپخانەكانی ئێران بۆ ماوەیەكی زۆر بۆردومانی گوندە سنورییەكانی قەزای پێنجوێنی سەر بە پارێزگای سلێمانییان كرد، كە بە هۆیەوە زیانێكی زۆریان بە ڕەز ‌و باخ ‌و دارستانی ناوچەكە گەیاند ‌و ژمارەیەكی زۆر لە هاوڵاتیانی گوندە سنورییەكان ناچار بوون ماڵ ‌و حاڵی خۆیان چۆڵ بكەن، هاتوچۆی هاوڵاتیان ‌و بازرگانەكانیش لە مەرزەكانەوە راگیرا.
-    رۆژی 14 ی ئەیلولی ساڵی 2005 مامۆستای میوزیكژەن ‌و هونەرمەندی ناوداری كورد (ولیەم یوحەننا) لەتەمەنی (74) ساڵیدا  لەشاری سلێمانی كۆچی دوایی كرد، مامۆستا ولیەم پیاوێكی لەسەرخۆ و ئارام بوو، بەشداریی لە چەندین بۆنەی هونەریدا كردبوو، هەروەها لەلای هونەرمەندانی كورد پێگەیەكی گەورە هەبوو، مامۆستا ولیەم ساڵی 1931 لەشاری سلێمانی هاتۆتە دنیاوە هەر لە منداڵییەوە خولیای میوزیك بوە و قۆناغەكانی خوێندنی سەرەتایی و ئامادەیی لە شاری سلێمانی تەواو كردوە، ساڵی 1955 یەكەم وەجبە بوە كە بەشی میوزیكی پەیمانگەی هونەرە جوانەكانی بەغدادی  تەواو كردوە، دواتر گەڕاوەتەوە بۆ شاری سلێمانی و بوەتە مامۆستای میوزیك ‌و لە زانكۆی سلێمانی وانەی بواری هونەری وتوەتەوە، دوو تیپی هونەریی بە ناوەكانی زێڕین و زیوین دروست كردوە، بەشداری فێستیڤاڵەكانی زانكۆكانی عیراقی كردوە و یەكێك بوە لەو پێنج مامۆستایانەی كە بانگهێشت كراون بۆ دەرەوەی عیراق، یەكێكیش بوە لە دامەزرێنەرانی تیپی مۆسیقای سلێمانی و كۆمەڵەی هونەرەجوانەكان و سەندیكای هونەرمەندانی كوردستان، ماوەیەكی زۆریش مامۆستا بوە لە چالاكی قوتابخانەكانی شاری سلێمانی و گەلێك هونەرمەندی بواری میوزیكی پێگەیاندوە.
-    رۆژی  15 ی ئەیلولی ساڵی 1972 (بەنگینە)ی شـاعیر كۆچی دوایی كرد، بەنگینە ناوی تەواوی بریتییە لە (فەیزوڵا باقر ئەحمەد)، ساڵی 1908 لەشاری سەقزی خۆرهەڵاتی كوردستان لەدایك بووە، بۆ پەیداكردنی بژێویی ژیانی لە تەمەنی لاوێتیدا رویكردوەتە باشوری كوردستان ‌و لە شاری سلێمانی نیشتەجێ‌ بووە، لە شاری سلێمانی دەستی كردوە بە خوێندن و لە خوێندنگەی زانستی ئێواران خوێندویەتی، لە شانۆگەریی (مەم و زین)دا رۆڵی (بەنگینە)ی بینیوە و لەدوای ئەوەوە پیرەمێردی شاعیر نازناوی (بەنگینە)ی داوەتێ، بەنگینە بە شاعیرێكی میللی ناسراوە و بەزمانی زۆرینەی خەڵك و چینی جوتیار و كرێكاران دواوە، ساڵی (1950) بەنگینە وەكو (شاعیری گەل) ناسێنراوە و شاعیرێكی نیشتمانپەروەر بووە و چەندین هۆنراوەی نیشتمانیی نوسیوە، بەهۆی هەڵوێستە نیشتمانپەروەرەكانیشیەوە لەلایەن دەزگا ئەمنییەكانی عێراقەوە دەستگیر كراوە لەگەڵ مامۆستا حەمە ساڵح دیلانی شاعیر ‌و هونەرمەنددا زیندانی كراون، دیوانە شیعرییەكەی ساڵی 2003 بەچاپ گەیەنراوە.
-    رۆژی 15ی ئەیلولی ساڵی 1984، لە كاتی گفتوگۆكانی نێوان یەكێتیی نیشتمانیی كوردستان ‌و حكومەتی عێراقدا كە بە مەبەستی چارەسەركردنی كێشەكانی باشوری كوردستان ‌و مافەكانی كورد ماوەیەك بوو گفتوگۆ دەستیان پێكردبوو، لە بۆسەیەكدا لە سەر ڕێگای نێوان تاسڵوجە ‌و سلێمانی، لەلایەن جاشەكانەوە هێرش كرایە سەر سەركردە ‌و پێشمەرگە (ملازم كەریم) ‌و دوای رووبەڕووبوونەوەیەكی سەخت تیرۆر كرا، بەو هۆیەشەوە گفتوگۆكانی نێوان هێزی پێشمەرگە ‌و حكومەتی عێراق تێكچوو.
-    ڕۆژی 15ی ئەیلولی ساڵی 1988، دامودەزگاكانی حكومەتی عێراق ئاگاداری دانیشتوانی گوندەكانی (قەرەگۆل ‌و بێستانسوور ‌و زەڕایەنی كۆن) ی سنوری ناحیەی عەربەتی سەر بە پارێزگای سلێمانییان كرد، گوندەكانیان چۆڵا بكەن، چونكە بەر شاڵاوی ڕاگواستن كەوتوون، هەرچەندە ئەو سێ‌ گوندەی سەر بە ناحیەی عەربەت، كەوتبوونە ناو ئۆردوگا زۆرەملێكانی (باریكە ‌و نەسر ‌و زەڕایەن)ەوە، بەڵام رژێمی بەعس هەرسێ‌ گوندەكەی بە زۆرەملێ‌ راگواست ‌و خاپووری كردن.
-    ڕۆژی 16ی ئەیلولی ساڵی 1984، چەند مەفرەزەیەكی هێزی پێشمەرگەی كوردستان، لە ناوچەكانی سلێمانی ‌و ناحیەی بازیان هەڵیانكوتایە سەر رەبییە ‌و بارەگاكانی هێزە ئەمنییەكان ‌و سوپای عێراق ‌و جاشەكانی سەر بە ڕژێم، كە لە ئەنجامی پێكدادان ‌و شەڕێكی سەختدا زیاتر لە 12 سەرباز ‌و جاش كوژران ‌و دوو ئۆتۆمبێلی سەربازییش لەلایەن پێشمەرگەوە سوتێنران.
-    ڕۆژی 16ی ئەیلولی ساڵی 1999، چوارەمین كۆنگرەی یەكێتیی زانایانی ئایینیی ئیسلامیی كوردستان لە شاری سلێمانی بەڕێوەچوو، كە ماوەی چەند ڕۆژێكی خایاند ‌و تێیدا ئەنجومەنێكی نوێ‌ بۆ یەكێتییەكە هەڵبژێردرا.
-    ڕۆژی 17ی ئەیلولی ساڵی 1954، بە فەرمانێكی حكومەتی عێراق (عومەر عەلی) كرایە موتەسەڕیفی سلێمانی ‌و دوای چەند رۆژێك لە دەرچوونی فەرمانەكەی بەغداد، عومەر عەلی گەیشتە شاری سلێمانی ‌و لە پۆستەكەیدا دەستبەكار بوو شوێنی (شامل یەعقوبی)ی گرتەوە.
-    ڕۆژی 17ی ئەیلولی ساڵی 1956، یانەی وەرزشی سلێمانی پێكهێنراوە، كە بوارەكانی یاریكردنی یانەكە چەندین جۆر یاریی وەرزشی لەخۆ دەگرت ‌و نوێنەرایەتی پارێزگای سلێمانی دەكرد لە یارییە ناوخۆییەكانی عێراقدا.
-    رۆژی  17 ی ئەیلولی ساڵی 1985 هێزە ئەمنییەكانی رژێمی بەعس، هەڵمەتێكی رەشبگیریان لەناو شاری سلێمانی دەست پێكرد، لە ماوەی چەند رۆژێكدا زیاتر لە 900 گەنجی شاری سلێمانییان دەستگیر كرد  كە زۆربەیان خوێندكار بوون، دوای تێپەڕبوونی چەند مانگێك بەسەر دەستگیركردنیاندا، لەلایەن دادگای بەناو سەورەوە زۆربەیان حوكم دران و ژمارەیەكیشان لەسێدارەدان، هەر هەمان رۆژ هێزە ئەمنییەكان بە پشتیوانیی تانك‌و زرێپۆش، هەڵیانكوتایە سەر گوندی (كانی بەردینە)ی سەر بە شاری سلێمانی ‌و گوندەكەیان كاول كرد.
-    رۆژی 17ی ئەیلولی ساڵی 1994، خاتوو (لێنێت مێجەرسۆن) كۆچی دوایی كردوە، لێنێت كچی مێجەرسۆنە كە لە بیستەكانی سەدەی بیستەمدا حاكمی ئینگلیز بوە لە شاری سلێمانی، ئەو خاتوونە دۆستێكی گەورەی گەلی كورد بووە، لە وەسیەتنامەكەیدا نیوەی سامانەكەی بەخشیبووە هەردوو شاری سلێمانی ‌و هەڵەبجەی شەهید.
-    رۆژی  18 ی ئەیلولی ساڵی 1924 یەكەم ژمارەی رۆژنامەی (ژیانەوە) لە شاری سلێمانی دەرچووە، ژیانەوە رۆژنامەیەكی رەسمیی حكومی بووە ‌و هەفتەی جارێك بڵاوكراوەتەوە، پیرەمێردی شاعیر ئەركی سەرپەرشتیكردن و بەڕێوەبردنی رۆژنامەكەی گرتوەتە ئەستۆ، (ژیانەوە) هەفتەنامەیەكی سیاسیی و ئەدەبیی و كۆمەڵایەتیش بووە، كە هەتا ساڵی 1956 بەردەوام بووە و وێڕای گرفت ‌و كۆسپەكان (56) ژمارەی لێ بڵاوكراوەتەوە ‌و خەڵكی سلێمانی ‌و تەواوی كوردستان سوودیان لە زانیاریی ‌و بابەتەكانی وەرگرتوە.
-    رۆژی 18ی ئەیلولی ساڵی 1993، تۆپخانەكانی ئێران بە خەستی بۆردومانی گوندەكانی دەوروبەری هەردوو ناوچەی (پێنجوێن ‌و قەڵادزێ‌)ی سەر بە پارێزگای سلێمانییان كرد، بۆردومانەكەش بۆ ماوەی دوو ڕۆژ درێژەی هەبوو، بەو هۆیەشەوە زیانێكی زۆر بە ناوچەكە گەیشت ‌و چەندین دۆنم دارستان ‌و باخی هاوڵاتیانی ناوچە سنورییەكان سوتان، دانیشتوانی گوندەكانیش بە ناچاری ماڵ ‌و حاڵی خۆیان بەجێهێشت ‌و دۆخێكی نائارامیش بۆ كاری بازرگانی ‌و هاتوچۆی هاوڵاتیان دروست بوو.
-    رۆژی 18 ی ئەیلولی ساڵی 2003 ئەدیب و نوسەری ناوداری كورد شكور مستەفا لە شاری هەولێر كۆچی دوایی كردوە، نوسەر و وەرگێڕی بەتوانا و زمانزانی لێهاتوو مامۆستا شكور مستەفا عەبدوڵا ساڵی 1926 لەدایك بووە،  كۆلێژی شەریعەی تەواو كردووە ، بە هۆی هەڵوێستی سیاسی زۆرجار بۆ شارەكانی ناوەڕاست و باشوری عێراق   دوورخراوەتەوە، ساڵی 1975 كراوە بە ئەمینداری گشتیی كۆڕی زانیاریی كورد لە شاری بەغداد، لەو ماوەیەدا رۆڵێكی باشی بینیوە و گەلێك پەڕتووكی بەنرخی لە زمانەكانی (توركی و ئازەری و عەرەبی)یەوە وەرگێڕاوەتە سەر زمانی كوردی ‌و بڵاوی كردوونەتەوە، ساڵی 1996 خانەنشین كراوە و ساڵی 1997 گەڕاوەتەوە بۆ هەرێمی كوردستان و لە شاری هەولێر نیشتەجێ‌ بووە و ساڵی 1998 كراوە بە سكرتێری كۆڕی زانیاریی كوردستان، نوسەرێكی چالاك و وەرگێڕێكی لێهاتوو بووە و زنجیرەیەك پەڕتووكی بە نرخی بە نوسین و  وەرگێڕان پێشكەش بە كتێبخانەی كوردی كردوە.
-    ڕۆژی 19ی ئەیلولی ساڵی 1980، ڕژێمی بەعس لە عێراق، هەڵبژاردنێكی كارتۆنیی لە باشوری كوردستان ئەنجامدا بۆ ئەنجومەنی بەناو (تەشریعی‌و تەنفیزی)، بەڵام لەلایەن جەماوەری گەلی كوردستانەوە بایكۆتی هەڵبژاردنەكە كرا ‌و مانگرتنی سەرتاسەری بەڕێوەچوو، لە شاری سلێمانی هاوڵاتیان دژی پرۆسەكە گردبوونەوەیان كرد ‌و لە چەند شوێنێك پەلاماری بنكە ‌و ناوەندەكانی دەنگدان درا، كە بە هۆیەوە نائارامی شارەكەی گرتەوە ‌و هێزە ئەمنییەكانی بەعس بە شەقام ‌و رێگا ‌و كۆڵانەكانی شاردا بڵاو كرانەوە.
-    ڕۆژی 19ی ئەیلولی ساڵی 1988، مەفرەزە پارتیزانەكانی هێزی پێشمەرگەی كوردستان هەڵیان كوتایە سەر بنكە ‌و بارەگاكانی سوپای بەعس لە ناوچەی (قۆپی قەرەداغ)ی سەر بە پارێزگای سلێمانی، كە بە هۆیەوە زیانێكی زۆری گیانی ‌و ماڵییان بە هێزە ئەمنییەكانی عێراق گەیاند ‌و دوای چەندین كاتژمێر شەڕ ‌و پێكدادان هێزەكانی پێشمەرگە لە ناوچەكە كشانەوە، دواتریش رژێمی بەعس هێزێكی زۆری رەوانەی سنورەكە كرد.
-    رۆژی  20 ی ئەیلولی ساڵی  1923 یەكەم ژمارەی رۆژنامەی (ئومێدی ئیستیقلال) لە شاری سلێمانی بڵاو كرایەوە، كە رۆژنامەیەكی (سیاسی، ئەدەبی، كۆمەڵایەتی) بووە بەشێوەی هەفتانە بڵاوكراوەتەوە، رۆژنامەكە ئۆرگانی حكومەتەكەی مەلیك مەحمود بووە كە پاش ئەوەی ئینگلیزەكان شاری سلێمانییان چۆڵ كردوە، لەلایەن حكومەتەكەی شێخ مەحمودەوە ئومێدی ئیستقلال دەردەكرا و 25 ژمارەی لێ‌ بڵاوكرایەوە، لە ژمارەی یەكەمەوە هەتا ژمارە 16 ئەحمەد خواجە و رەفیق حیلمی و حسێن نازم بەڕێوەبەر و سەرنوسەری رۆژنامەكە بوون، بەڵام لەدوای ژمارە 16 وە ناوی سەرنوسەری تێدا نەدەنوسرا.
-    رۆژی 20 ی ئەیلولی ساڵی 1959 تێكۆشەری ناسراو سەعید قەزاز لەسێدارە دراوە، ناوی تەواوی بریتییە لە سەعید مەجید ئەحمەد قەزاز، ساڵی 1904 لەشاری سلێمانی لەدایك بووە، سەرەتای خوێندنی لە حوجرەی ئاینییەوە دەست پێكردوە و دواتر چوەتە قوتابخانە، لە ماوەی ژیانیدا چەندین پۆستی حكومیی پێسپێردراوە وەكو بەڕێوەبەری ناحیە و قائیمقام و موتەسەریف (واتە پارێزگار)، لە زۆربەی كابینەكانی حكومەتی عێراقیشدا پۆستی وەزاریی پێدراوە، دوای بەرپابونی شۆڕشی 14 ی تەموزی ساڵی 1958‌و كودەتای سوپا بەسەر سیستمی پاشایەتیدا، سەعید قەزاز راستەوخۆ خۆی رادەستی كاربەدەستانی نوێی عێراق‌ كردوە و ئەوانیش بەڵێنی ئازادبونیان پێداوە، لە كاتی بەڕێوەچوونی  پرۆسەی دادگاییكردنی بەرپرسانی سەردەمی پاشایەتیدا، رەوتی دادگاییكردنەكەی سەعید قەزاز بە پیلانی كۆمەڵێك عەرەبی شۆزێنی بە ئاراستەیەكی تردا براوە و بڕیاری لەسێدارەدانی بۆ دەرچوە، بەو هۆیەشەوە لە سێدارە دراوە.
-    رۆژی 20ی ئەیلولی ساڵی 1947، نوسەر ‌و مێژوونوسی ناوداری گەلی كورد مامۆستا (حسێن حوزنی موكریانی) لە شاری بەغدای پایتەختی عێراق بە هۆی نەخۆشییەوە كۆچی دوایی كردووە، دواتریش تەرمەكەی هێنرایەوە بۆ شاری سلێمانی ‌و لە رێوڕەسمێكدا بە ئامادەبوونی ژمارەیەكی زۆر لە خەڵكی شاری سلێمانی بەخاك سپێردرا.
-    ئێوارەی ڕۆژی 20ی ئەیلولی ساڵی 1985، مەفرەزەكانی هێزی پێشمەرگەی كوردستان، لە نزیك ناوچەی تانجەرۆی سەر بە شاری سلێمانی، هێرشیان كردە سەر چەند رەبییە ‌و بنكە ‌و بارەگایەكی سوپای عێراق، كە لە ئەنجامدا دەستیان بە سەر دوو ڕەبییەدا گرت ‌و زیانێكی زۆری گیانیی ‌و ماڵیشیان بە هێزەكانی عێراق گەیاند، دەستیشیان بە سەر چەندین پارچە چەك ‌و ئۆتۆمبێل ‌و كەرەستەی سەربازییدا گرت ‌و دواتر بەبێ‌ هیچ زیانێكی ئەوتۆ لە سنورەكە كشانەوە.
-    ڕۆژی 20ی ئەیلولی ساڵی 1995، یەكەم ژمارەی گۆڤاری (سپێدە) لە شاری سلێمانی بڵاوكراوەتەوە، كە گۆڤارێكی ئەدەبی ‌و رۆشنبیری ‌و كۆمەڵایەتی بوە ‌و لەلایەن ژمارەیەك نوسەر ‌و ئەدیبەوە سەرپەرشتیی دەكرا.
-    ڕۆژی 21ی ئەیلولی ساڵی 1970دا، كۆنگرەی زانایانی ئایینی كوردستان لە ناوچەی گەڵاڵەی باشوری كوردستان بەڕێوەچووە، كە تێیدا لیژنەی تەنفیزی ‌و دەستەی سەرپەرشتیاری یەكێتییەكە هەڵبژێردراون، ئەو رێكخراوە تایبەت بوە بە كاروباری ئایینی ‌و مامۆستایانی دیاری باشوری كوردستان رۆڵیان هەبوە لە پێكهێنانیدا.
-    ڕۆژی 22ی ئەیلولی ساڵی 1820، لە ناوچەكانی سلێمانی ‌و دەوروبەری، بە هۆی بڵاوبوونەوەی نەخۆشیی ئاوڵەوە، دۆخی ناوچەكە رووبەڕووی پشێویی بوەوە، كە لە ماوەیەكی كەمدا چەندین كەس گیانیان لەدەست دا ‌و لە نێوانیاندا كوڕێكی (مەحمود پاشای بابان)ی میری بابان هەبوو، دوای هەوڵێكی زۆری پزیشك ‌و شارەزایانی بواری تەندروستیی ئەو سەردەمە نەخۆشییەكە كۆنترۆڵ كراوە.
-    رۆژی 22 ی ئەیلولی ساڵی 1973 مامۆستا رەمزی قەزاز كۆچی دوایی كردوە، رەمزی قەزاز ساڵی 1914 لە شاری سلێمانی چاوی بە دنیا هەڵهێناوە، قۆناغەكانی خوێندنی سەرەتایی و ناوەندیی لە شاری سلێمانی بڕیوە، دواتر چوەتە شاری بەغداد بۆ تەواوكردنی خوێندن ‌و خانەی مامۆستایانی تەواو كردوە، هەر لە سەردەمی لاوێتییەوە خولیای نیشتمانپەروەریی ‌و كوردایەتی داویەتی لە سەری ‌و دەستی بە چالاكیی سیاسی كردوە، بەو هۆیەشەوە دەستگیر كراوە و راپێچی زیندان كراوە، بەڵام زیندانیش نەیتوانیوە لە بیری ئازادی پەشیمانی بكاتەوە بۆیە دوای ئازادبونی لە زیندان لە شەستەكاندا پەیوەندیی كردوە بە شۆڕشی ئەیلولەوە، رەمزی قەزاز بێجگە لە كاری سیاسی، خولیای نوسینیشی هەبوە ‌و كەسێكی خاوەن فكر ‌و روناكبیر بوە ‌و لە زۆربەی گۆڤار و رۆژنامەكانی ئەو سەردەمەدا چەندین بابەتی لەسەر پرسە نیشتمانیی ‌و نەتەوەییەكان نوسیوە، بێجگە لە زمانی كوردی، زمانەكانی عەربی و ئینگلیزی و توركیی بەباشی زانیوە.
-    ئێوارەی ڕۆژی 22ی ئەیلولی ساڵی 1987، لە چەند چالاكییەكی مەفرەزەكانی هێزی پێشمەرگەی كوردستاندا، لە سەر ڕێگای نێوان قەزای چەمچەماڵا ‌و ناحیەی سەنگاو، دەیان سەربازی سوپای عێراق كوژران ‌و ژمارەیەكی زۆریش بریندار بوون، بێجگە لەوەش چەندین ئۆتۆمبێلی سەربازیی تێكشكێنران، دوای پاشەكشەی پێشمەرگە، سوپای عێراق هێزێكی زۆری رەوانەی سنورەكە كرد.
-    بەرەبەیانی ڕۆژی 23ی ئەیلولی ساڵی 2001، هێزێكی ڕێكخراوی ئەنسارولئیسلام لە گوندی (خێڵی حەمە)ی دەشتی شارەزوری سەر بە پارێزگای سلێمانی، هێرشیان كردە سەر بارەگای هێزەكانی یەكێتیی نیشتمانیی كوردستان ‌و چەندین چەكداری یەكێتییان بەشێوەیەكی دڕندانە كوشت، كە بوە مایەی ناڕەزایەتییەكی زۆر لە ناو خەڵكی سلێمانی ‌و باشوری كوردستان.
-    رۆژی 23ی ئەیلولی ساڵی 2003، لە میانی كۆبوونەوەیەكی بەرفراوانی ڕێكخراوی نەتەوە یەكگرتووەكاندا، (كوفی ئەنان)ی سكرتێری گشتیی ڕێكخراوەكە، كیمیابارانكردنی شاری هەڵەبجەی بە ڕووداوێكی جینۆساید لەقەڵەم دا ‌و داوای كرد، كۆمەڵی نێودەوڵەتی رێگریی بكات لە دووبارەبوونەوەی تاوانی لەو شێوەیە.
-    ڕۆژی 24ی ئەیلولی ساڵی 1988، مەفرەزەكانی هێزی پێشمەرگەی كوردستان لە چەند ناوچەیەكی جیاجیای سلێمانی ‌و ناوچەی گەرمیان، هێرشیان كردە سەر بنكە ‌و بارەگاكانی سوپای عێراق، كە بەهۆیانەوە زیانێكی زۆری گیانیی ‌و ماڵییان بە هێزەكانی عێراق گەیاند.
-    ڕۆژی 24ی ئەیلولی ساڵی 1994، لە نزیك ناوچەی بانیخێڵانی سەر بە قەزای دەربەندیخان، لەلایەن مێژوونوس ‌و شوێنەوارناسی كورد مامۆستا (عەبدولڕەقیب یوسف)ەوە، گۆڕستانێكی سەردەمی كۆن دۆزرایەوە، كە مێژووەكەی دەگەڕایەوە بۆ سەردەمی پێش زایین.
-    رۆژی 26ی ئەیلولی ساڵی 1999، بۆ یەكەم جار لە باشوری كوردستان، بە بەشداریی ژمارەیەكی زۆر لە هونەرمەند ‌و هونەردۆستان فێستیڤاڵێكی تایبەت بە كورتە فیلمی كوردی ساز كرا، لە میانی فێستیڤاڵەكەشدا چەند كورتە فیلمێك پێشكەش ‌و نمایش كرا ‌و پرۆسەكەش لەلایەن تەلەفزیۆنی گەلی كوردستانەوە سەرپەرشتی دەكرا، دوای كۆتاییهاتنی فێستیڤاڵەكەش خەڵات بەخشرایە براوەكان، ئەو هەوڵەش بوە سەرەتایەك بۆ سازدانی فێستیڤاڵەكە لە ساڵانی دواتردا.
-    ڕۆژی 27ی ئەیلولی ساڵی 1986، هێزەكانی سوپای عێراق لە چەند قۆڵێكەوە هێرشیان كردە سەر ناوچەی قەیوان لە سنوری شارباژێڕی سەر بە پارێزگای سلێمانی، بەڵام لەلایەن هێزی پێشمەرگەی كوردستانەوە زۆر بەتوندی بەرپەرچ درانەوە ‌و هێرشەكە تێكشكێنرا، زیانەكانی عێراقیش لەو شەڕەدا، دەیان كوژراو و بریندار ‌و تێكشكانی چەندین ئۆتۆمبێل ‌و ئامێری سەربازیی بوون.
-    ڕۆژی 28ی ئەیلولی ساڵی 1930، بەفەرمانی حكومەتی عێراق، بۆ جاری دووەم (ئەحمەد بەگی تەوفیق بەگ) كە ناوی تەواوی (ئەحمەد تەوفیق ساڵح سلێمان بەگ)ە، كرایەوە بەموتەسەڕیفی لیوای سلێمانی ‌و هەتا ساڵی 1935 لەو پۆستەدا مایەوە، پێشتریش لە نێوان ساڵانی 1925 بۆ 1927 لە هەمان پۆستدا بوو، بەڵام بەهۆی گۆڕانكاریی لە كابینەی حكومەتەكانی عێراقدا، ئەحمەد ئەربیلی لە شوێنی دانرا.
-    ڕۆژی 28ی ئەیلولی ساڵی 1987، هێزە ئەمنییەكانی بەعس لە ناحیەی بەكرەجۆی سەر بە پارێزگای سلێمانی، بە بەرچاوی خەڵكەوە سێ‌ گەنجی كوردیان گوللـەباران كرد، كە پێشتر لەشاڵاوی دەستگیركردنی خەڵكی سلێمانیدا لەلایەن بەعسییەكانەوە دەستگیر كرابوون.
-    رۆژی 28ی ئەیلولی 1988، هێزە ئەمنییەكانی ڕژێمی بەعس لە چەند قۆڵێكەوە هێرشیان كردە سەر گوندەكانی ناوچەی پشدەری سەر بە پارێزگای سلێمانی، هێرشەكەش بە پشتیوانیی فڕۆكە ‌و جاش ماوەی سێ‌ ڕۆژی خایاند ‌و تێیدا نزیكەی دە گوندی سەر بە قەزای قەڵادزێیان خاپوور كرد ‌و دانیشتوانەكانیشیان بەشێكیان ئاوارەی ناوچەكانی دیكە بوون.
-    ڕۆژی 28ی ئەیلولی ساڵی 1991، گۆڕێكی بەكۆمەڵا لە ناو سەربازگەیەكی پێشووی سوپای بەعسدا دۆزرایەوە لە (معەسكەر سارداو) لە نزیك شاری سلێمانی، كە روفاتی نۆ هاوڵاتیی كوردی تێدا بوو، دوای لێكۆڵینەوە لە روفاتەكان دەركەوت كە ساڵی 1985 لەلایەن هێزە ئەمنییەكانی سوپای عێراق ‌و بەعسەوە لە شاڵاوەكانی رەشبگیریدا دەستگیر كرابوون ‌و دواتر گوللـەباران كرابوون.
-    رۆژی 28ی ئەیلولی ساڵی 1997، هێزە ئاسمانییەكانی توركیا بە خەستی بۆردومانی گوندە سنورییەكانی ناوچەی سەرسەنگی سەر بە پارێزگای سلێمانییان كرد، هێرشەكەش لە ژێر پاساوی تێكشكاندنی بنكە ‌و بارەگاكانی پارتی كرێكارانی كوردستان ئەنجام درا، بەڵام زیانێكی زۆری بە سنورەكە گەیاند.
-    ئێوارەی ڕۆژی 29ی ئەیلولی ساڵی 1983، چەند مەفرەزەیەكی هێزی پێشمەرگەی كوردستان لەسەر ڕێگای نێوان ڕانیە ‌و چوارقوڕنە ‌و سەر بە پارێزگای سلێمانی، هەڵیانكوتایە سەر ڕەبیەیەكی سوپای عێراق ‌و سەرجەم سەربازەكانی ناویان بەدیل گرت، دەستیشیان گرت بە سەر ژمارەیەكی زۆر چەك ‌و كەرەستەی سەربازیدا ‌و لە سنورەكە كشانەوە، دواتر هێزە ئەمنییەكانی عێراق لە سنورەكەدا بڵاوەیان كرد ‌و هەڵمەتێكی پشكنینان لە سنورەكەدا دەست پێكرد.
-    ڕۆژی 29ی ئەیلولی ساڵی 1998، 22 پارت ‌و ڕێكخراو ‌و لایەنی سیاسیی باشوری كوردستان، لە شاری سلێمانی بەیاننامەیەكیان بڵاو كردەوە ‌و تێیدا پشتیوانیی خۆیان بۆ ڕێكەوتننامەی واشنتۆنی نێوان یەكێتیی نیشتمانیی كوردستان ‌و پارتی دیموكراتی كوردستان دەربڕی، داواشیان كرد ناكۆكییەكانی باشوری كوردستان ‌و شەڕی براكوژی بە یەكجاریی كۆتایی پێبێت.
-    رۆژی 30 ی ئەیلولی ساڵی 1922 شێخ مەحمودی حەفید گەڕایەوە بۆ شاری سلێمانی، گەڕانەوەكەشی دوای  ئەوە هات كە دەسەڵاتدارانی ئینگلیز بڕیاری دورخستنەوەیان هەڵوەشاندبوەوە و رێگەیان پێدابوو لە هندستانەوە بگەڕێتەوە بۆ باشوری كوردستان، بڕیارەكەی دەسەڵاتدارانی ئینگلیز دوای گوشارێكی زۆری جەماوەریی خەڵكی باشوری كوردستان ‌و بە تایبەت شاری سلێمانی هات، كە دوای دەستگیركردنی مەلیكی كوردستان شەپۆلێكی گەورەی ناڕەزایەتیی ‌و خۆپیشاندان دروست بوو تێیدا ئیدانەی بڕیارەكەیان كرد و داوای گەڕانەوەی شێخ مەحمودیان كردبوو.

 


 ئه‌م بابه‌ته‌ 128 جار بینراوه‌




هه‌واڵی زیاتر

هه‌واڵه‌كان