هه‌رچه‌نده وه‌زاره‌تی سامانه سروشتیه‌كان به‌ڵێنی پێدانی دوو كۆبوونی نه‌وت به هاوڵاتیانی شاری سلێمانی دابوو به‌ڵام تا ئێستا ئه‌و به‌ڵێنه جێ به جێ نه‌كراوه.
غالب محه‌مه‌د سه‌رۆكی لیژنه‌ی پیشه‌سازی و وزه و سه‌رچاوه سروشتیه‌كان له ئه‌نجومه‌نی پارێزگای سلێمانی ڕایگه‌یاند: ڕۆژانه ده‌توانرێت ته‌نها دوو ملیۆن لتر نه‌وت بدرێت به هاوڵاتیان ، له‌وه‌ش زیاتر ناتوانرێت له‌به‌ر ئه‌وه‌ی ڕێككه‌وتن له گه‌ڵ كۆمپانیا كراوه.
ناوبراو ڕایگه‌یاند: پارێزگای سلێمانی ده‌توانێت رۆژانه 11 ملیۆن لتر نه‌وت له عه‌مباره‌كانیدا هه‌ڵبگرێت به‌ڵام له‌و بڕه كه‌متر گه‌یشتووه بۆیه له ماوه‌ی 5 مانگی ڕابردوودا له 1-4-2015 وه تا 21-9-2015 ی ئه‌مساڵ توانراوه ته‌نها 48 ملیۆن لتر دابه‌ش بكرێت.
ووتیشی: وه‌زاره‌تی سامانه سروشتیه‌كانمان ئاگادار كردۆته‌وه له دابینكردنی سووته‌مه‌نی بۆ شاری سلێمانی به‌ڵام هه‌تا ئێستا قه‌یرانه‌كه به‌رده‌وامه و چاره‌سه‌ر نه‌كراوه و بڕه نه‌وتی پێویستیشمان پێ نه‌گه‌یشتووه.
جێ باسه بۆ وه‌رزی زستانی ئه‌مساڵ شاری سلێمانی پێویستی به 300 ملیۆن لتر نه‌وت هه‌یه به‌ڵام له ماوه‌ی 5 مانگی ڕابردوودا توانراوه ته‌نها 48 ملیۆن لتر دابه‌ش بكرێت، ئه‌مه‌ش خه‌ڵكی تووشی نیگه‌رانی كردووه.
