به‌مه‌به‌ستی چاره‌سه‌ركردنی گرفته‌كانی كاسبكارانی عه‌لوه‌ كۆنه‌كه‌ی سلێمانی، ئه‌مڕۆ له‌دیوانی پارێزگای سلێمانی كۆبونه‌وه‌یه‌ك له‌نێوان به‌ڕێوه‌به‌ری كارگێڕی و یاسایی و كاسبكاران ئه‌نجامدرا.

دوای ئه‌وه‌ی فه‌رمانی دروستكردنی عه‌لوه‌یه‌كی نوێ له‌سلێمانی‌و لابردنی عه‌لوه‌كۆنه‌كه‌ی ئێستای ئه‌و شاره‌ درابوو له‌لایه‌ن ئه‌نجومه‌نی وه‌زیرانه‌وه‌، ئه‌و بڕیاره‌ بووه‌ مایه‌ی نیگه‌رانی به‌شێك له‌ كاسبكارانی عه‌لوه‌كه‌ی ئێستا، بۆ ئه‌و مه‌به‌سته‌ ئه‌مڕۆ 8ی ئاداری 2016 له‌لایه‌ن عه‌بدولخالق محه‌مه‌د به‌ڕێوه‌به‌ری كارگێڕی پارێزگای سلێمانی و حاكم سه‌رچڵ به‌ڕێوه‌به‌ری به‌شی یاسایی له‌دیوانی پارێزگا پێشوازییان له‌ به‌شێك له‌نوێنه‌رانی كاسبكارانی ئه‌و عه‌لوه‌یه‌كرد به‌مه‌به‌ستی چاره‌سه‌ركردنی ئه‌و كێشه‌یه‌.

له‌لایه‌ن به‌ڕێوه‌به‌ری كارگێری و به‌شی یاسایی سلێمانییه‌وه‌ هۆكاری هه‌ڵوه‌شانه‌وه‌ی عه‌لوه‌كۆنه‌كه‌ بۆ كاسبكاران ڕونكرایه‌وه‌، كه‌ فه‌رمانه‌كه‌ له‌لایه‌ن ئه‌نجومه‌نی وه‌زیرانه‌وه‌ ده‌رچووه‌، ئه‌ویش به‌هۆی ئه‌وه‌ی زیاده‌ڕۆییه‌كی زۆر له‌و عه‌لوه‌یه‌دا هه‌یه‌، له‌جێگه‌ی ئه‌وه‌ عه‌لوه‌یه‌كی نوێ و به‌شێوازێكی نوێ دروستده‌كرێت.