بۆ زیاتر خزمەتكردن بە منداڵان و ڕێگریكردن لە نەخۆشییەكانیان، لە شاری سلێمانی كۆنفرانسێكی گرنگ ساز كرا، كە بۆ ماوەی دوو رۆژ بەردەوام بوو.
رۆژانی پێنجشەممە و هەینی 27 و 28/1/2023، لە هۆتێل گراند میلینیۆم و بە ئامادەبوونی ( د. ڕەهێڵ فەرەیدون ) بریكاری وەزارەتی تەندروستیی هەرێم و (د. هەڤاڵ ابوبكر ) پارێزگاری سلێمانی و ژمارەیەك لە بەرپرسان و پزیشكانی بەئەزموون لە عێراق و كوردستان و سلێمانی، یەكەم كۆنفرانسی سلێمانی بۆ نەخۆشییەكانی منداڵان بەڕێوەچوو، كە لەلایەن بەڕێوەبەرایەتیی گشتیی تەندروستی سلێمانی و كۆلێژی پزیشكیی زانكۆی سلێمانی و كۆمەڵەی پزیشكانی نەخۆشییەكانی منداڵان لە كوردستان عێراق و پزیشكانی شارەزا و بەئەزموون سەرپەرشتی دەكرا.
لە كۆنفرانسەكەدا چەندین پزیشكی پسپۆڕی منداڵان كە لە عێراق و وڵاتانی دەرەوە هاتبوون بەشدارییان كرد و ماوەی دوو ڕۆژ بەردەوام بوو، تێیدا چەندین راسپاردە ئامادە كران و لە داهاتوودا پێشكەش بە لایەنی پەیوەندیدار دەكرێن، چەندین دەرمان و كەلوپەلی تایبەت بەنەخۆشییەكانی منداڵانیش نمایش كران.
ئامانج لە كۆنفرانسی سلێمانی بۆ نەخۆشییەكانی منداڵان، بۆ كۆكردنەوەی پزیشكانی پسپۆڕی ورد بووە لە نەخۆشییەكانی منداڵاندا، هەروەها زیاتر ئاڵوگۆڕكردنی بابەتە زانستییە پزیشكییەكانی تایبەت بە چارەسەری منداڵان، لە رۆژانی یەكەم و دووەمی كۆنفرانسەكەدا چەندین چالاكیی بەڕێوەچوون و لە كۆتاییدا قەڵغانی ڕێز پێشكەش بەو پزیشكانەی كرا، كە خزمەتێكی زۆریان پێشكەش بەنەخۆش و نەخۆشخانەی منداڵان كردوە لە شاری سلێمانی .
پارێزگاری سلێمانی لە وتەیەكدا دەستخۆشیی لە ئامادەكار و بەڕێوەبەر و بەشداربوانی كۆنفرانسەكە كرد و ئامادەیی پارێزگای سلێمانیشی پیشاندا بۆ هەر جۆرە هاوكاریی و هەماهەنگییەك، لە پێناو خزمەتكردنی زیاتری كەرتی تەندروستی، بەتایبەت پاراستنی تەندروستیی منداڵان.
بۆ زانیاریی زیاتر لە بارەی كار و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن و نوێترین هەواڵ و زانیاریتان بەدەست بگات، بەم ئەدرەسانەی خوارەوە:
https://twitter.com/SlemaniGov
https://www.linkedin.com/company/30141235/admin/
https://www.facebook.com/slemanigov/
https://www.instagram.com/slemani_governorate/
