بەناوی پارێزگای سلێمانییەوە؛ پیرۆزبایی یادی سەدو بیست و حەوت ساڵەی دەرچوونی یەکەم ڕۆژنامەی کوردیی و ڕۆژی ڕۆژنامەگەریی کوردیی، لە هەموو ڕۆژنامەنوسانی کوردستان و جیهان دەکەین، یادی پڕ فەڕو بەرات و بەخششی لێبڕاوانەی بەدرخانییەکان و بەتایبەت میقداد میدحەت بەدرخان و عەبدوڕەحمان بەگی بەدرخان و هەموو ئەو منەوەرە جوامێرانە؛ بەرز ڕادەگرین، کە بناغەی ڕۆژنامەگەریی کوردییان داناو تا ئەمڕۆ بەردەوامییان پێبەخشی، درود بۆ ئەو ڕۆژنامەوانانە دەنێرین کە گیانی خۆیان لە پێناوی گەیاندنی ڕاستییەکاندا کردە قوربانیی.
دەخوازین بنەماکانی ڕاستیی و وردیی و بابەتیبوون و بێلایەنیی و پەیامداریی ببنە پایە سەرەکییەکانی ڕۆژنامەگەریی کوردیی و لەم سەردەمی تەکنۆلۆژیای زانیاریی و زیرەکیی دەستکردو زۆریی دەرفەتی سەکۆو دیوارە ئەلکترۆنیی و کۆمەڵایەتییانەدا، ڕۆژنامەگەریی ڕۆڵی ڕاستەقینەی خۆی لە چاودێریکردن و بەدواداچوونی دەسەڵاتەکان و دەسەڵاتداران و، خستنەڕوو پاراستنی ڕاستییەکان و گەشەکردنی کۆمەڵایەتییی و پەرەپێدانی ژیانی گشتیی و ڕای گشتیی و پاراستنی ئازادیی ڕادەربڕین و بەهێزکردنی گیانی لێبوردەیی و قبوڵکردنی یەکترو پێکەوەژیان و چەسپاندنی ئاتامیی دەرونیی تاک و ئاسایشی کۆمەڵایەتیی و ئاشتیدا ؛ ببینێت.
بەرزو پیرۆزبێت یادی ڕۆژنامەگەریی کوردیی.

د.هەڤاڵ ئەبوبەکر
پارێزگاری سلێمانی