ماوەیەكە دیاردەی وردەواڵافرۆشی و سواڵكردنی منداڵانی ئاوارە لەسەر شەقامەكانی شاری سلێمانی هەستی پێدەكرێت و پارێزگاری سلێمانیش لەهەوڵدایە بەهاوكاری رێكخراوەكانی سەر بەنەتەوەیەكگرتووەكان كۆتای بەو دیاردەیە بهێنن
ئەمرۆ 31ی كانوونی دووەمی 2017، سەردار قادر لەبری پارێزگاری سلێمانی پێشوازیكرد لە (برۆنۆ گیدۆ) لێپرسراوی یەكەمی ڕێكخراوی UNHCR لە عێراق و خاتوو (ئان) لێپرسراوی رێكخراوەكە لە سلێمانی.
لە دیدارێكدا كە (بابەرەسوڵ غەفور) بەرێوەبەری سەنتەری ھەماھەنگی قەیرانەكان JCCی سلێمانی ئامادەی بوو، هەردوو لا گفتوگۆیان كرد سەبارەت بە بارودۆخی ئاوارەكان و پێداویستییەكانیان و خۆ ئامادەكردن بۆ هاتنی ئاوارەی نوێ بەتایبەت لەكاتی ئازادكردنی ناوچەكانی حەویجە.
لە دیدارەكەدا سەردار قادر لەبری پارێزگاری سلێمانی جەختی لە هەماهەنگی زیاتری دەزگاكانی حكومەت و رێكخراوەكانی نەتەوەیەكگتووەكان و رێكخراوە خێرخوازییەكان كردەوە بۆ بەدەمەوەچوونی زیاتری ئاوارەكان.
راشیگەیاند هەموو هەماهەنگییەك دەكەن بۆ ئەوەی ئەو ئاوارانەی ناوچەكانیان ئازاد كراوە بە رێك و پێكی بگەڕێنەوە شوێنەكانی خۆیان.
لەبەشێكی تری كۆبونەوەكەدا گفتوگۆ باس لە دیاردەی سواڵكردن و دەستگێڕی منداڵانی ئاوارە لە نێو ترافیك و شەقامەكانی شاری سلێمانی كرا، پارێزگاری سلێمانی بە دیاردەیەكی نائینسانی و ناشارستانی وەسف كردوو كەھاوڵاتیانیشی نیگەرانكردوە داوای كرد رێكخراوەكانی نەتەوەیەكگرتووەكان هاوكاریان بن بۆ كۆتایهێنان بەو دیاردەیە.
لەو رووەشەوە بریاردرا كە لەرێگەی رێكخراوەكانەوە زانیاری لەسەر خێزانی ئەو منداڵە ئاوارانە وەربگیرێت و دواتر بەپێی پێویست هاوكاری بكرێن و لەسەر جادەكان دووریان بخەنەوەو بیانگێڕنەوە بۆ خوێندن.
ئەوەش خرایە روو كە نزیكەی 40%ی مندڵانی ئاوارەكان لەدەرەوەی كەمپەكانن و ئەمەش بەشێكیانی دوورخستووەتەوە لە خوێندن بۆیە ئەم دیاردەیە پێویستی بە چارەسەركردنە.
