وەزیری گەشەپێدانی نێودەوڵەتی كەنەدا سەردانی پارێزگای سلێمانی دەكات و رایدەگەیەنێت وڵاتەكەی بەردەوام دەبێت لە هاوكاری و پاڵپشتییەكانی بۆ عیراق و هەرێمی كوردستان بە تایبەتی و دەستخۆشیش لە ئیدارەی سلێمانی دەكات بۆ هاوكاری و بەهاناوەچوونی پەنابەران و ئاوارەكان.

ئەمرۆ 27ی شوباتی 2017، ماری كلود بیبو وەزیری گەشەپێدانی نێودەوڵەتی كەنەدا و وەفدێكی یاوەری سەردانی  پارێزگای سلێمانیان كردوو لەلایەن عومەر قەڵادزێی جێگری پارێزگاری سلێمانی پێشوازیان لێ‌ كرا.

لەدیدارێكدا تاوتوێی بارودۆخی سلێمانی و رەوەشی ئاوارەكان و پرۆژە و هاوكارییەكانی كەنەدا كرا.

جێگری پارێزگاری سلێمانی ئاماژەی بۆ ئەوەكرد 7 كەمپ بۆ ئاوارەكان لەسنوری پارێزگای دروستكراوەو زیاتر لە 60 هەزار خێزانیش وەك پەنابەرو ئاوارە پەنایان بۆ پارێزگای سلێمانی هێناوە.

وتیشی:حكومەتی هەرێم كەمتەرخەمی نەكردووە لە هاوكاری و دابینكردنی پێداویستی ئاوارەكان، بەڵام بەهۆی شەڕی داعش و قەیرانی داراییەوە وەك پێویست نەمانتوانییوە هەموو پێداویستی و خزمەتگوزراییەكان بۆ ئاوارەكان دابین بكەین. سوپاسی حكومەتی كەنەدی و رێكخراوە نێودەوڵەتییەكانیشی كرد كە هاوكار و پاڵپشتی حكومەتی هەرێم بوون  بۆ رووبەروونەوەی قەیرانەكان.

لەبەرامبەردا وەزیری گەشەپێدانی نێودەوڵەتی كەنەدا دەستخۆشی لە دانیشتوان و ئیدارەی سلێمانی كرد بۆ پەنادان و لەخۆگرتنی ئەو ژمارە زۆرە لە ئاوارەو پەنابەران و رایگەیاند: حكومەتی وڵاتەكەی بەردەوام دەبێت لە پاڵپشتی كردن و هاوكاریكردنی عیراق و هەرێمی كوردستان بە تایبەتی، چی لەرووی بونیادنانەوە چی لەرووی سەربازییەوە بۆ رووبەروونەوەی تیرۆر.

روونیشی كردەوە بەپێی بریاری وڵاتەكەی پابەندن بەوەی بۆ ماوەی 3 ساڵ هاوكاری هەرێمی كوردستان دەكەن بۆ رووبەروونەوەی داعش.

ئاماژەی بۆ ئەوەش كرد ئامانجی سەردانەكەیان بۆ پارێزگای سلێمانی لەنزیكەوە ئاگادار بوون و بەسەركردنەوەی ئەو پرۆژانەیە كە وڵاتەكەی ئەنجامی داوەو بۆ ئەومەبەستەش سەردانی كەمپی عەربەت و شارۆچكەی تەكیە دەكەن  وتیشی: بۆ ئێمە زۆر گرنگە بزانین كە ئەو پرۆژانە تا چەند سودی هەبووەو سەركەوتوو بوون.