پارێزگار و قائیمقامی سلێمانی سوپاس و پێزانینی خۆیان ئاڕاسته‌ی هاووڵاتیانی سلێمانی و هه‌موو هێزه ئه‌منییه‌كان و ئه‌و تیمانه ده‌كه‌ن كه ڕۆڵی گرنگیان بینی له به‌ڕێوه‌چوونی ڕێ و ڕه‌سمی نه‌ورۆزی ئه‌مساڵ به بێ هیچ گرفتێك و ڕووداوێكی نه‌خوازراو.
له په‌یامێكدا هه‌ر یه‌ك له (سه‌ردار قادر) پارێزگاری سلێمانی و (ئاوات محه‌مه‌د) قائیمقامی سلێمانی به بۆنه‌ی كۆتایی هاتنی ڕێ و ڕه‌سمی نه‌ورۆز له شاری سلێمانی كه به بێ هیچ گرفت و ڕووداوێكی نه‌خوازراو به‌ڕێوه‌چوو سوپاس و پێزانینی خۆیان ئاڕاسته‌ی هه‌ر یه‌ك له هێزه‌كانی ئاساییش ، پۆلیس و كارمه‌ندانی هاتووچۆ و ڕۆشنبیری و به‌رگری شارستانی و گه‌شت و گوزار و شاره‌وانی و تیمه‌كانی ته‌ندروستی و چاودێری بازرگانی و هه‌موو به‌ڕێوه‌به‌رایه‌تیه‌كانی تر كردووه كه ئه‌و ئه‌ركه‌ی كه پێیان سپێردرابوو به بێ كه‌م و كورتی جێبه‌جێیان كردووه، هه‌روه‌ها سوپاسی هاووڵاتیانی سلێمانی و هه‌موو ئه‌و گروپانه‌ش ده‌كه‌ن كه به‌شداربوون له چالاكییه‌كانی ڤیستیڤاڵی نه‌ورۆزی سلێمانیدا.
له به‌شێكی تری په‌یامه‌كه‌دا ئه‌وه هاتووه به پێ ی ئه‌و پلانه‌ی كه دانرابوو ڕێ و ڕه‌سمی نه‌ورۆز له سلێمانی به بێ هیچ گرفت و ڕووداوێكی نه‌خوازراو به‌ڕێوه‌چوو كه ئه‌مه بۆ هه‌موو لایه‌ك جێگه‌ی ده‌ستخۆشی و سه‌ركه‌وتنه.
