ڕێگه‌ له‌ بردنه‌ ده‌ره‌وه‌ی ئاردی بایعی ده‌گیرێت و قائیمقامی سلێمانیش ڕایده‌گه‌یه‌نێت ئامانجمان پاراستنی نرخی ئارد و ڕێگری كردنی به‌رزبوونه‌وه‌ی نرخه‌كه‌یه‌تی.

بۆ ئه‌م مه‌به‌سته‌ قائیمقامی سلێمانی له‌ دیوانی قائیمقامیه‌ت له‌ گه‌ڵ نوێنه‌رانی لایه‌نه‌ په‌یوه‌ندیداره‌كان كۆبووه‌ بۆ گفتوگۆكردن له‌ باره‌ی ڕێگرتن له‌ بردنه‌ ده‌ره‌وه‌ی ئاردی بایعی به‌ شێوه‌یه‌كی نایاسایی و دانانی میكانیزم و رێوشوێنی پێویست بۆ كۆنترۆڵكردنی بازار و پاراستنی نرخی ئارد.

هه‌ر له‌و كۆبونه‌وه‌یه‌دا قائیمقامی سلێمانی ئاماژه‌ی به‌وه‌ كرد له‌ ڕێگه‌ی لیژنه‌ هاوبه‌شه‌كانی قائیمقامیه‌تی سلێمانیه‌وه‌ چاودێری كارگه‌كانی به‌رهه‌مهێنانی عه‌له‌ف و ئاردی بازرگانی وه‌كیله‌كانی ئاردی بایه‌عی ده‌كرێت. تاوه‌كو به‌ شێوه‌یه‌كی یاسایی كار بكه‌ن و هیچ ئاردێكی بایه‌عی نه‌بردرێته‌ ده‌ره‌وه‌ی سنوری پارێزگای سلێمانی، ئامانجیشمان پاراستنی نرخی ئارد و ڕێگریكردنه‌ له‌ به‌رزبوونه‌وه‌ی نرخه‌كه‌ی.

له‌و باره‌یه‌وه‌ گۆران قادر سه‌رۆكی لیژنه‌ هاوبه‌شه‌كانی قائیمقامیه‌تی سلێمانی ڕایگه‌یاند بردنه‌ ده‌ره‌وه‌ی ئاردی بایه‌عی ته‌نها بۆ كارگه‌كانی به‌رهه‌مهێنانی عه‌له‌ف ڕێگه‌ پێدراوه‌، له‌ ڕێگه‌ی لیژنه‌كانمانه‌وه‌ چاودێڕی كارگه‌كانی عه‌له‌ف و به‌رهه‌مهێنانی ئاردی بازرگانی و وه‌كیله‌كانی ئاردی بایه‌عی ده‌كه‌ین و هه‌ر شوێنێك پابه‌ندی یاسا و ڕێنماییه‌كان نه‌بێت لێپێچینه‌وه‌ و مامه‌ڵه‌ی یاسایی له‌ گه‌ڵدا ده‌كرێت.