كاركردنی كارمه‌ندی خوار ته‌مه‌ن 18 ساڵ و بوونی مێرد منداڵ له‌ كافتریاكاندا له‌ سلێمانی قه‌ده‌غه‌ ده‌كرێت و له‌ ماوه‌ی ڕابردووشدا به‌ هۆی پابه‌ند نه‌بوونیان چه‌ند كافتریایه‌ك داخراون.

گۆران قادر سه‌رۆكی لیژنه‌ هاوبه‌شه‌كانی قائیمقامیه‌تی سلێمانی ڕایگه‌یاند : به‌ پێ ی یاسا و ڕێنماییه‌كان كاركردنی كارمه‌ندی خوار ته‌مه‌ن 18 ساڵ و سه‌ردانی مێرد منداڵ له‌و كافتریایانه‌ی كه‌ نێرگه‌له‌ی تێدا ده‌كێشرێت ڕیگه‌پێدراو نیه‌، به‌ڵام به‌ پێچه‌وانه‌وه‌ به‌شێك له‌ كافتریاكان پابه‌ند نین به‌و ڕێنماییانه‌وه‌ و ڕێگه‌ به‌ كاركردن و سه‌ردانی مێرد منداڵ ده‌ده‌ن بۆ كافتریاكان. ده‌شڵێت : به‌ هۆی پابه‌ند نه‌بوونی خاوه‌ن كافتریاكانه‌وه‌ له‌ ماوه‌ی ڕابردوودا له‌ سلێمانی سزای دارایی چه‌ندین كافتریایان داوه‌ و به‌شێكیان داخستووه‌ و ته‌نانه‌ت هه‌ندێكیان به‌ هۆی جۆری سه‌رپێچیه‌كانیانه‌وه‌ ڕووبه‌ڕووی دادگا كراونه‌ته‌وه‌.

سه‌رۆكی لیژنه‌ هاوبه‌شه‌كانی قائیمقامیه‌تی سلێمانی ڕایگه‌یاند: له‌ نوێترین بڕیاریاندا لیژنه‌كان به‌ هۆی پابه‌ند نه‌بوون به‌ مه‌رج و ڕێنماییه‌كانی كاركردنه‌وه‌ به‌ تایبه‌ت كاركردن و بوونی مێرد منداڵی خوار ته‌مه‌ن 18 ساڵ كافتریای ( ماڵی ئه‌ستێره‌كان) یان له‌ شه‌قامی مه‌لیك مه‌حمود بۆ ماوه‌ی 10 ڕۆژ داخستووه‌.

نابراو ئه‌وه‌شی ڕاگه‌یاند: هه‌ڵمه‌ته‌كانیان به‌رده‌وام ده‌بێت و هه‌ر كافتریایه‌ك پابه‌ند نه‌بێت به‌ مه‌رج و ڕێنماییه‌كانی كاركردنه‌وه‌ ڕووبه‌ڕووی سزای یاسایی ده‌كرێته‌وه‌.