بە سەرپەرەشتی عومەر ئەحمەد ئەمین(عومەر قەڵادزێی) لەبری پارێزگاری سلێمانی، لیژنەی باڵای چارەسەركردنی كێشە كشتوكاڵییەكانی پارێزگای سلێمانی كۆبووەوە.
لە كۆبوونەوەكەدا كە هەریەك لە شاڵاو جەمال بەرێوەبەری گشتی كشتوكاڵی سلێمانی و سەرۆكی لقی سلێمانی سەندیكای جوتیاران و بەرێوەبەری ئاودێری سلێمانی و بەرێوەبەری كشتوكاڵی بەرزنجەو لێپرسراوی هۆبەی كشتوكاڵی پارێزگا ئامادەی بوون، ژمارەیەك دۆسیەی كێشە لەسەری زەوی و زاری گوندەكانی پارێزگای سلێمانی قسەیان لەسەر كراو بریاری پێویستیان لەبارەوە درا.
تەوەرێكی تری كۆبوونەوەكە تەرخانكرابوو بۆ بابەتی وەرگرتنی گەنمی ئەمساڵ لە جوتیاران و ئەوە خرایە روو كە حكومەتی ناوەندی عیراق بریاریداوە كە بۆ ئەمساڵ تەنیا بڕی 422 هەزار تەن گەنم لە جوتیارانی هەرێم وەربگرێت و لەو بڕەش پارێزگای سلێمانی و ئیدارەی گەرمیان تەنیا 110 هەزار تەنی بۆ دیاریكراوە، ئەمەش نیوەی ئەو بڕەیە كە پار وەرگیراوە.
بۆیە لە كۆبوونەوەكەدا بریاردرا ئەوە پەسەند نەكرێت و لەرێگەی سەرۆكایەتی ئەنجومەنی وەزیران و بەغداوە گوشار بكرێت بۆ ئەوەی بەشی سلێمانی زیاتر بكرێت بۆ ئەوەی جوتیاران توشی كێشەو گرفت و ساغ نەبوونەوەی بەرهەمەكانیان نەبنەوە.
هەروەك بریاردرا كار بكرێت بۆ گرتنەبەری رێوشوێنی پێویست بۆ ئەوەی گەنمی دەرەوەی پارێزگاكەو دەرەوەی هەرێم بەناوی گەنمی ناوخۆوە نەهێنرێتە سایلۆكان و ساغ نەكرێنەوە.
.jpg)
