قائیمقامی سلێمانی ئاماری لیژنه‌ی (2) سه‌ر به‌ لیژنه‌ هاوبه‌شه‌كان بڵاوده‌كاته‌وه‌ كه‌ به‌ پێ ی ئاماره‌كه‌ له‌ ماوه‌ی 10 مانگی ڕابردوودا لیژنه‌كه‌ هه‌زار و 521 شوێنی به‌سه‌ر كردۆته‌وه‌ و له‌و ژماره‌یه‌ش چه‌ندین شوێن به‌ هۆی سه‌رپێچیه‌وه‌ ڕووبه‌ڕووی سزای دارایی و داخستن كراونه‌ته‌وه‌.

له‌ ئاماره‌كه‌دا هاتووه‌ لیژنه‌ی (2) یه‌كێكه‌ له‌ لیژنه‌ هاوبه‌شه‌كانی قائیمقامیه‌تی سلێمانی و له‌ ماوه‌ی 10 مانگی ڕابردوودا له‌ 1-1-2015 بۆ 31-10-2015 ، لیژنه‌كه‌ سه‌ردانی هه‌زار و 521 شوێنی كردووه‌ و له‌ ئه‌نجامی به‌دواداچوونی پشكنینه‌كانیشدا به‌ هۆی كه‌م و كورتی و وه‌ك پێویست پابه‌ندنه‌بوونیان به‌ مه‌رج و ڕێنماییه‌كانه‌وه‌ (282) شوێن پسوڵه‌ی سه‌رپێچیان بۆ كراوه‌ و به‌شێك له‌ وانه‌ش به‌ هۆی جۆری سه‌رپێچیه‌كانیانه‌وه‌ ڕووبه‌ڕووی سزای دارایی كراونه‌ته‌وه‌.

هاوڕی محه‌مه‌د سه‌رۆكی لیژنه‌ی (2) سه‌ر به‌ لیژنه‌ هاوبه‌شه‌كانی قائمیقامیه‌تی سلێمانی ڕایگه‌یاند:كاری لیژنه‌كانیان به‌ دواداچوونه‌ بۆ ناو بازار و هه‌موو ماركێت و ڕێستوڕانت و دوكانه‌كانی شاری سلێمانی و ده‌وروبه‌ری و به‌داواداچوونه‌ بۆ چۆنیه‌تی جێ به‌ جێ كردنی مه‌رج و ڕێنماییه‌كان.

ووتیشی له‌ ماوه‌ی 10 مانگی ڕابردوودا 1521 شوێنیان به‌سه‌ر كردۆته‌وه‌ و له‌ ئه‌نجامی گه‌ڕان و پشكنینه‌كانیان 282 شوێن به‌ هۆی پابه‌ند نه‌بوونیانه‌وه‌ ڕووبه‌ڕووی سزا كراونه‌ته‌وه‌ و 21 شوێنیش به‌ هۆی جۆری سه‌رپێچیه‌كانیانه‌وه‌ داخراون.

سه‌رۆكی لیژنه‌ی 2 ڕاشیگه‌یاند: له‌ ماوه‌ی ئه‌و 10 مانگه‌دا هیچ شوێنێك ڕووبه‌ڕووی دادگا نه‌كراوه‌ته‌وه‌ و ئه‌وه‌ی گه‌ڕانده‌وه‌ بۆ كه‌مبوونه‌وه‌ی جۆری سه‌رپێچیه‌كان و پابه‌ندبوونی به‌شێكی زۆری شوێنه‌كان به‌ مه‌رج و ڕێنماییه‌كانه‌وه‌.