بڕیارە لەسەرەتای مانگی  داهاتوو هەفتەی ڕۆشنبیری و كەلتوری گەلی فەلەستینی لە سلێمانی بەڕێوەبچێت.

ئەمرۆ 3ی نیسانی 2017، نەزمی حزوری كونسوڵی فەلەستین لە هەرێمی كوردستان سەردانی پارێزگای سلێمانی كردوو لەلایەن سەردار قادر ل. پارێزگاری سلێمانی پێشوازی لێكرا.

لەدیدارێكی هەروو لادا  كونسوڵی فەلەستین لەهەرێمی كوردستان رایگەیاند بەمەبەستی زیاتر پتەوكردنی پەیوەندی نێوان هەردوو گەلی فەلەستین و كوردستان كە لەزۆر روِوی ڕۆشنبیری و سیاسییەوە لەیەك نزیكن  بریارە مانگی ئایاری داهاتوو هەفتەی كەلتوری و ڕۆشنبیری فەلەستینی لە هەرێمی كوردستان ئەنجام بدەن.

سەردار قادر لەبری پارێزگاری سلێمانی وێرای خۆشحاڵیان بە ئەنجامدانی ئەو چالاكییە ڕۆشنبیرییە هەموو ئامادەیی و پشتیوانی تەواوی نیشاندا بۆ  ئەنجامدانی ئەو چالاكیە ڕۆشنبیرییە بەهاوكاری بەڕێوەبەرایەتی گشتی ڕۆشنبیری سلێمانی.

 پاشان پارێزگار  كورتەیەكی مێژوویی لەسەر پارێزگای  سلێمانی لەڕووی سیاسی و فكری و ڕۆشنبیرییەوە بۆ كونسوڵی فەلەستین خستەڕوو، هەروەك بەراوردێكی خەباتی فەلەستینی و خەباتی گەلی كورد كرد كە هەردوو گەل كار بۆ مافی چارەی خۆنوسین دەكەن.

پارێزگار كورتەیەكی مێژوویی لەسەر ئاشناییان بە خەبات و هەوڵە چارەسەرییەكانی  كێشەی فەلەستین دا و باسی لەململانێ ناوخۆییەكانی لایەنە فەلەستینیەكان كرد كە كاریگەری خراپی لەسەر دۆسێیەی فەلەستین هەبووە.

لای خۆیەوە كونسوڵی فەلەستین خۆشحاڵی خۆی نیشاندا بە ئاشنای پارێزگار  بە مێژوو و خەبات و كێشەی فەلەستینیەكان و باسی لەوە كرد كە ململانێ ناوخۆییەكانی هەرێمی كوردستان بە هەمان شێوە كاریگەری خراپی لەسەر دۆخی سیاسی و ئابوری هەرێم داناوە

وتیش: مایەی نیگەرانییە كە دەرگای پەرلەمان داخراوە هیوای خواست كە گەلی كورد لە پێناو ئامانجە گەورەكەیدا ململانێ شەخسی و حزبیەكان وەلا بنێ.