وەزارەتی تەندروستی هەرێمی كوردستان ناوی نەخۆشخانەی  منداڵانی فێركاری سلێمانی گۆڕی .

وەزیری تەندروستی حكومەتی هەرێم د.رێكەوت حەمەرەشید لە راگەیاندراوێكدا ئاشكرای دەكات: دوای ڕاوێژ لەگەڵ تەندروستی سلێمانی بڕیارماندا کەناوی نەخۆشخانەی فێرکاری منداڵانی سلێمانی بگۆڕین بۆ نە خۆشخانەی دکتۆر جەمال ئەحمەد ڕەشید.

وەزیری تەندروستی روونیشی دەكاتەوە ئەو بریارە لە پای ئەو هەموو خزمەت و ماندوویەتی و دڵسۆزیە  كە دكتۆر جەمال ئەحمەد رەشید پێشكەشی مناڵانی شاری سلێمانی  و کوردستانی كردووە.

رۆژی 4ی ئەیلولی2018 ، دكتۆر جەمال ئەحمەد رەشید، پسپۆڕو راوێژكاری نەخۆشییەكانی منداڵان  بەهۆی نەخۆشیەوە كۆچی دوای كرد.

دكتۆر جەمال ئەحمەد رەشید یەكێك بووە لە دكتۆرە  بەخشندەو لە خۆبردووەكانی سلێمانی و ناوبانگێكی فراوانی لەنێو خەڵكدا هەبووە.

دكتۆر جەمال ئەحمەد لە ساڵی 1944 لەشاری سلێمانی لەدایك بووە، ساڵی 1968 كۆلێژی پزیشكی تەواو كردووەو لەو كاتەشەوە بەردەوام بووە لە خزمەتكردنی منداڵانی نەخۆشی سلێمانی و كوردستان.