بەڕێوەبەرایەتی دارستان‌و پاوانی سلێمانی، پڕۆژەیەكی گرنگی بۆ خزمەتكردنی جووتیاران‌و ئاژەڵداران‌و خاوەن كێڵگەكانی گاوداری دەستپێكرد.پڕۆژەیەكە پەرەپێدانی پاوانی دەستكردە بۆ ژمارەیەك گوندی سنووری پارێزگای سلێمانی، لێپرسراوی هۆبەی پاوانیش رایدەگەیەنێت، پڕۆژەكە دابینكردنی تۆوی وێنجەو پەینی كیمیاییەو دەبێتە سەرچاوەیەكی هەرزان بۆ دابینكردنی ئاڵف‌و دواجاریش سودێكی ئابووری زۆری دەبێ بۆ جووتیاران.

لەوبارەیەوە، سەروەر مەجید لێپرسراوی هۆبەی پاوان بە کوردستانی نوێی راگەیاندوە، دەستمان كردوە بە پڕۆژەی پەرەپێدانی پاوانی دەستكرد كە تێیدا 137 جووتیار لە 36 گوند لە 10 قەزاو ناحیەی جیاوازی سەر بەپارێزگای سلێمانی‌و چەمچەماڵ لێی سودمەند دەبن.

دەشڵێت: «پڕۆژەكە لەسەر بودجەی وەزارەتی كشتوكاڵ‌و سەرچاوەكانی ئاوی هەرێم جێبەجێ دەكرێت، كە خۆی دەبینێتەوە لە دابینكردنی تۆوی وێنجەو پەینی كیمیایی بۆ جووتیاران‌و ئاژەڵداران‌و خاوەن كێڵگەكانی گاوداری لە سنووری پارێزگای سلێمانی‌و چەمچەماڵ».
لێپرسراوی هۆبەی پاوان ئاماژەی بەوەشكردوە، تیمەكانیان لە 19ی 11ی 2018 دەستیان بەكاركردن كردووەو بەپێی بەرنامەیەكی تایبەت سەردانی ئەو ناوچانە دەكەن كە پێشوەخت لەسەر داواكاری جووتیاران‌و بەپێی پلانی هۆبەكە دەستنیشان كراوە.
روونیشی دەكاتەوە: «جیاواز لە ساڵانی رابردوو ئەمساڵ تۆوی وێنجەی توركی دابەش دەكرێت بەسەر جووتیاراندا كە رێژەی چاندنی بەرزەو پاكژە‌و پارێزراوە لەهەر گرفتێكی وەك تێكەڵبوونی تۆوی مشەخۆرەكانی وەك حامول».

 وێنجە رووەكێكی بەتەمەنە و 6 تا 7 ساڵ دەمێنێتەوەو ساڵانە 8 بۆ 9 جار لێی دەبڕرێتەوەو بۆ هەر دۆنمێك نزیكەی 2 بۆ 3 تۆن بەرهەمی دەبێت، واتە لەساڵێكدا 20 بۆ 25 تۆن بەرهەمی ئاڵفی دەبێت، ئەمەش دەبێتە سەرچاوەیەكی باش بۆ بەرهەمهێنانی شیر.