لە دەروازە و خاڵە سنورییەكانی پارێزگای سلێمانی مەرجەكانی سەلامەتی و پشكنین توندتر دەكرێنەوە و رێگریی تەواو لەهاتنەناوەوەی هەموو جۆرەكانی كاڵا و خواردنی زیانبەخش بەتایبەت ماددە پلاستیكییەكان دەكرێت.
ئەمڕۆ دووشەممە 22/7/2019، لە دیوانی قائیمقامیەتی سلێمانی و بە ئامادەبونی سەرجەم لایەنە پەیوەندیدارەكان كۆبوونەوەیەكی فراوان بەسەرپەرشتیی ئاوات محەمەد قائیمقامی سلێمانی بەڕێوەچوو، ئامانج لە كۆبوونەوەكە توندكردنی رێوشوێنەكانی پشكنین و مەرجەكانی سەلامەتی و ئەو رێكارە یاساییانەیە كە لە دەروازە و خاڵە سنورییەكان لە كاتی هاتنەناوەی كاڵاو شتومەكدا دەگیرێتەبەر.
قائیمقامی سلێمانی رایگەیاند: هاتنەناوەوەی هەندێك مەوادی زیانبەخشی وەك پلاستیك و نایلۆن زیان بە ژینگە و تەندروستیی هاوڵاتیان دەگەیەنێت و پێویستە بەر لە هاتنەناوەیان لە خاڵە سنورییەكان رێگرییان لێبكرێت.
دوای تاووتوێكردنی هەموو ئەو لایەنانەی كە پەیوەستن بە مامەڵەی خاڵە سنورییەكان و هاوردەكردنی كاڵا و شتومەك و گۆڕینەوەی راو سەرنجی لایەنە پەیوەندیدارەكان، بەشداربوانی كۆبوونەوەكە گەیشتنە ئەم ئەنجامانە:
1. لە دەروازە و خاڵە سنورییەكان رێگریی تەواو لە هاتنەناوەوەی هەموو جۆرە كاڵا و شتومەكێكی زیانبەخش بكرێت بە تایبەت پلاستیك و نایلۆن.
2. ئەو مەوادە پلاستیكیی و نایلۆنانەی كە لە خاڵە سنورییەكانەوە هاوردە دەكرێن، پێویستە مەرجەكانی كوالێتی كۆنترۆڵیان تێدا بێت.
3. رێكار و مەرجەكانی پشكنین لە خاڵە سنورییەكان توندتر بكرێنەوە، بە ئامانجی پاراستنی تەندروستیی هاوڵاتیان.
4. لە چوارچێوەی یاساو رێنماییەكان لە خاڵە سنورییەكاندا هاوكاریی و كارئاسانیی پێویست پێشكەش بە بازرگان و سەرمایەدارەكان بكرێت.
5. لایەنە پەیوەندیدارەكان لە هەماهەنگیی و پەیوەندیی بەردەوامدا دەبن بۆ ئەوەی گرفت و كەموكورتییەكان دەستبەجێ چارەسەر بكرێن.
6. ئەو كارگانەی كە لەناوخۆی پارێزگای سلێمانی سەتڵی پلاستیكی دروست دەكەن، پابەند دەكرێن بە مەرجەكانی كوالێتی و تەندروستی، هەر كارگەیەك مۆڵەتی نەبێت یان مەوادی زیانبەخش بەرهەم بهێنێت رووبەڕووی سزای توند دەبێتەوە.
6. پێویستە كارگەكانی ئاوی خواردنەوە، ئەو دەبانەی كە بەكاریان دەهێنن لەمەوادی سەرەتایی دروست بكرێن و مەوادی ریسایكلین نەبن، لەكاتی گواستنەوەشیاندا داپۆشراو بن و لە بەر تیشكی خۆردا نەگوازرێنەوە.
