بەسەرپەرشتیی بەڕێز پارێزگاری سلێمانی، لە كەمپی ئاشتی لە سنوری ناحیەی تانجەرۆ مەراسیمێك بۆ یادی پێنج ساڵەی تاوانی كۆمەڵكوژیی ئێزدییەكان لە قەزای شەنگال بەڕێوەچوو. 
ئەمڕۆ شەممە 3/8/2019، د. هەڤاڵ ئەبوبەكر پارێزگاری سلێمانی، بە ئامادەبوونی بەڕێزان ڕاوێژكاری بەڕێز سەرۆك كۆماری عێراق و پەرلەمانتاران و بەڕێوەبەری ناحیەی تانجەرۆ و نوێنەری خەڵكی سەربەرزی شەنگال و لایەنە پەیوەندیدارەكان و فەرمانگەكانی سنورەكە و دانیشتوانی شەنگال لە كەمپی ئاشتی، بەشداریی لە یادی پێنج ساڵەی تاوانی كۆمەڵكوژیی شەنگالدا كرد.
پارێزگاری سلێمانی لە وتەیەكدا پشتیوانیی پارێزگای بۆ خەڵكی سەربەرزی شەنگال و چەسپاندنی ئاشتی و ئاسایش و ئارامیی و ئاوەدانكردنەوەی ناوچەكە دەربڕی، داواشی لە لایەنە پەیوەندیدارە ناوخۆیی و عێراقی و نێودەوڵەتییەكان كرد، چارەنووسی 2908 بێسەروشوێنكراوی شەنگال دیاری بكەن.
پارێزگاری سلێمانی وەفا و ڕێزی بۆ شەهیدان و گیانبازیی هەموو لایەنە بەشدارەكانی رزگاركردنی قەزای شەنگال دەربڕی ‌و بە گرنگی زانی هەرچی زووە قەزای شەنگال ‌و ناوچە رزگاركراوەكانی دیكە بە تەواوی ئاوەدان بكرێنەوە.
رۆژی 3ی ئابی ساڵی 2014 رێكخراوی داعش هێرشی كردە سەر قەزای شەنگال ‌و ناوچەكانی دەوروبەری ‌و لە ئاكامی هێرش ‌و پەلاماری دڕندانەی چەكدارانی سەر بەو رێكخراوەدا، زۆربەی دانیشتوانی ناوچەكە ئاوارە بوون، هاوكات ژمارەیەكی زۆری ئێزدییەكان شەهید ‌و بریندار بوون ‌و هەزارانیشیان لێ‌ بەدیل گیران.

بۆ زانیاریی زیاتر لەبارەی هەواڵ ‌و چالاكییەكانی پارێزگاری سلێمانی، دەتوانن لە تۆڕی كۆمەڵایەتیی فەیسبووك فۆڵۆمان بكەن:

https://www.facebook.com/slemanigov/