بەدواداچوونى مامەڵەكەت

ژمارەى نوسراوى پارێزگا

پن كۆد

ئەنجومەنی وەزیران چەند بڕیارێك دەدات


ڕۆژی سێشەممە ٢٥/ ٢/ ٢٠٢٠ ئەنجومەنی وەزیرانی هەرێمی كوردستان بە سەرپەرشتی مەسرور بارزانی سەرۆكی حكومەتی هەرێمی كوردستان و ئامادەبوونی قوباد تاڵەبانی جێگری سەرۆك وەزیرانی هەرێمی كوردستان و پارێزگارەكانی هەرێم و سەرپەرشتیاری هەردوو ئیدارەی گەرمیان و راپەڕین، كۆبوونەوەی ئاسایی هەفتانەی خۆی ئەنجامدا.
لە كۆبوونەوەكەدا گفتوگۆ دەربارەی پلان و هەنگاو و رێكارەكانی حكومەتی هەرێمی كوردستان بۆ رووبەڕووبوونەوەی مەترسیی ڤایرۆسی كۆرۆنا كرا.
سەرۆكی ئەنجومەنی وەزیران ئاماژەی بەوەدا، كە سەلامەتیی و پاراستنی ژیانی هاووڵاتییان لە سەرووی هەموو شتێكەوەیە و هەموو هەوڵێك دەدەن و رێوشوێنی پێویست دەگرنەبەر بۆ پاراستنی هاووڵاتییانی هەرێمی كوردستان.
لەوبارەیەوە ئەنجومەنی وەزیران بڕیاریدا:
• رۆژانە زانیاریی دروست و رێنمایی پێویست لە رێگەی دەزگاكانی راگەیاندنەوە بە رای گشتی بدرێت.
• لە رۆژی چوارشەممە رێكەوتی ٢٦/ ٢/ ٢٠٢٠ لە سەرجەم ناوەندەكانی خوێندن و قـوتـابخانە وباخچە و پەیمانگە حكومیی و تایبەتییەكانی هەرێمی كوردستان تا رۆژی ١٠/ ٣/ ٢٠٢٠ بكرێتە پشوو، سەبارەت بە زانكۆ و پەیمانگە حكومی و تایبەتەكانیش لە رۆژی شەممە ٢٩/ ٢/ ٢٠٢٠ تا ١٠/ ٣/ ٢٠٢٠ پشووی فەرمی دەبێت. دواتریش لە ١١ تا ٢٣/ ٣/ ٢٠٢٠ پشووی ساڵانەی بەهار دەبێت و لە رۆژی ٢٤/ ٣/ ٢٠٢٠ پرۆسەی خوێندن دەست پێدەكاتەوە. هەردوو وەزارەتی پەروەردە ‌و خوێندنی باڵاش سەرپشك دەكرێن بۆ قەرەبووكردنەوەی رۆژانی پشوو لە چوارچێوەی ئەمساڵی خوێندندا.
• بڕیاردرا گەشتی ناپێویست لە نێوخۆی هەرێمی كوردستان، یان ئەو گەشتیارانەی لە شارەكانی دیكەی عێراق دێنە هەرێم بۆ ماوەیەكی دیاریكراو سنووردار بكرێت و پشكنینی پێویستیش بۆ هەموو ئەو گەشتیارانە بكرێت كە دێنە ناو سنوورەكانی هەرێمی كوردستان.
• بەهیچ شێوەیەك رێگە بە قۆرخكردن و گرانكردنی شتومەك لە بازاڕەكانی هەرێمی كوردستان نادرێت و رێوشوێنی یاسایی توند بەرامبەر سەرپێچیكاران دەگیرێتەبەر. چاوپۆشیش لە پشكنینی پزیشكیی ئەوانەش ناكرێت كە دێنە ناو هەرێمی كوردستانەوە.
• حكومەتی هەرێم دڵنیایی دەدات كە گشت پێداویستییەكانی هاووڵاتییان دابین دەكات وجموجۆڵی بازرگانی بەردەوام دەبێت بە رەچاوكردنی رێنماییە تەندروستییەكان.
• ئەنجومەنی وەزیران، وەزارەتی دارایی و ئابووری راسپارد كە پێداویستیی پارێزگاكان و ئیدارە سەربەخۆكان دابین بكات. پێشنیارەكانی هەردوو وەزارەتی ناوخۆ و تەندروستیش پەسەند كران و هەردوو وەزارەتەكە راسپێردران بۆ جێبەجێكردنیان.
• ئەنجومەنی وەزیران داوا لە هاووڵاتیانیش دەكات هاوكاریی جێبەجێكردنی پلان و رێنماییەكانی دامودەزگا پەیوەندیدارەكانی حكومەت بن و رێنماییەكانی خۆپارێزییش لەبەرچاو بگرن و جێبەجێی بكەن.


هه‌واڵی زیاتر