لیژنەی باڵای ئۆپراسیۆنەكانی پارێزگای سلێمانی ئاگاداركردنەوەیەك بڵاودەكاتەوە سەبارەت بە پابەندبوون بە رێنماییەكان بۆ خۆپارێزیی لە ڤایرۆسی كۆرۆنا، ئەمەی خوارەوە دەقی ئاگادارییەكەیە:

ئاگاداركردنەوەیەك لە لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆناوە

‏‎هاووڵاتیانی خۆشەویست
‏‎بەناوی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆناوە، لەگەڵ ڕێز و سوپاسماندا بۆ خۆپارێزیی و خۆڕاگریتان؛ ‏‎ئاگادارتان دەكەینەوە پابەندی تەواوی ڕێكار و ڕێنماییە تەندروستیی‌ و كارگێڕیی ‌و ئارامییەكان و قەدەغەكردنی هاتووچۆ بن.
‏‎لە سەعات (٦)ی ئێوارە بۆ (١٢)ی شەو قەدەغەی تەواوی هاتووچۆیە، جگە لەو بوارانەی لە بەیانی ژمارە (۲٦)ی وەزارەتی ناوخۆدا دیاریكراون، هەر جوڵەیەكی تر قەدەغەیە.
‏‎لە سەعات (١٢)ی شەو بۆ سەعات (٦)ی بەیانی تەنها بۆ حاڵەتی زۆر پێویستی دیاریكراو بەپێی ڕێنماییەكان لە سنوری قەزای مەڵبەندی سلێمانیدا ڕێگا بە هاتووچۆ دەدرێت.
‏‎لە سەعات (٦)ی بەیانی بۆ (٦)ی ئێوارە، قەدەغەی هاتووچۆ بەردەوام دەبێت جگە لەو كات ‌و شوێنانەی ڕێگەیان پێدراوە.
‏‎هەر هاووڵاتیەك هەوڵی شكاندنی قەدەغە بدات بە ئۆتۆمبێل، ڕێكاری یاسایی توندی بەرامبەر دەگیرێتەبەر، پێویستە هاووڵاتیان تەنها بە پێ‌ لە گەڕەكەكانی خۆیاندا لە كاتی پێویستدا پێداویستییەكانیان دابین بكەن.
‏‎هیچ هاووڵاتیەك بە ئۆتۆمبێل بەدەر لە ڕێكار و ڕێنماییەكان، مافی جوڵەی نییە.
‏‎هەر تیمێكی پشكنین و چاودێریكردنی قەدەغەكردنی هاتووچۆ كەمتەرخەمیی بنوێنێت، بەپێی ڕێكارە دیاریكراوەكان ڕووبەڕووی سزای یاسایی دەبێتەوە.
‏‎بەڕێزان، بە خۆپارێزیی ‌و خۆڕاگریی ‌و پابەندیی ئێوە دەتوانین ئەم دۆخە مەترسیدارە تێبپەڕێنین، هەر سەركەشیی ‌و بێباكیی ‌و زیادەڕەویی ‌و سەرپێچییەك زیانی گەورە بە تەندروستیی گشتیی‌ دەگەیەنێت و دەمانگەڕێنێتەوە بۆ چەقی مەترسییەكان.
‏‎بۆیە جارێكی تر داوای پابەندیی و خۆپارێزیی ‌و ‏‎خۆڕاگریتان لێدەكەین.
‏‎سوپاس بۆ هۆشیاریی و هەماهەنگیی ‌و هاوكاریتان.

‏‎د. هەڤاڵ ئەبوبەكر
‏‎پارێزگاری سلێمانی
‏‎سەرۆكی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا
١٣/ ٤/ ٢٠٢٠