لەچوارچێوەی پرۆگرامی هاوتایی شاری سلێمانی لەگەڵ شارەوانییەكانی هەرێمی ئومبریا لە ئیتاڵیا، ئەحمەد عەلی ئەحمەد جێگری پارێزگاری سلێمانی، لە دیوانی پارێزگادا، پێشوازییكرد لە چوار سەرۆكی شارەوانی ئەو هەرێمە و بەرپرسی كۆمپانیایەكی هاوبەشی حكومیی- تایبەت لەگەڵ هەردوو رێكخەری فێڵكۆس ئومبریا و لەدیدارێكدا گفتوگۆ لەبارەی سیستمی ئیشكردنیان لە بوارەكانی شارەوانی و خزمەتگوزارییەكان و چۆنێتی پاراستنی ئاو و ژینگە، كرا.
دواتر لە سیمینارێكدا، بەئامادەبوونی جێگری بەڕێوەبەری گشتیی شارەوانییەكانی سلێمانی و چەند سەرۆك شارەوانییەك و بەڕێوەبەری ژینگەی سلێمانی و نوێنەرانی بەڕێوەبەرایەتی ئاوی سلێمانی، وەفدی میوان چەند بابەتێكیان لەسەر سیستمی ئیشكردنیان لە بواری گەیاندنی خزمەتگوزارییەكان پێشكەشكرد و لەگەڵ ئامادەبوواندا لەوبارەیەوە گفتوگۆیان كرد.
هەر لە چوارچێوەی سەردانەكەیاندا، سەردانی قوتابخانەی ئەزمڕی نمونەییان كرد، كە لەماوەی دوو مانگی رابردوودا لە پەیوەندییەكی پەروەردەیی دوولایەنەدا، لەگەڵ قوتابخانەیەكی ئامادەیی لە ئیتاڵیا پەیوەندیی بەردەوامیان هەبووەو بەمەبەستی چۆنێتی سودوەرگرتن لەئاو و پاراستنی ژینگەو بەرزكردنەوەی هۆشیاریی لەبارەی ئاو بەشداریی ۆركشۆپی هاوبەشیان كردبوو، خەڵاتی كۆتایی پێشكەش بە بەشداربووان كرا.
پاشان وەفدی میوان سەردانی پڕۆژەی ئاوی دوكان – سلێمانی و وێستگەی ئاوی سەرچناریان كرد و لەنزیكەوە هەردوو پرۆژەكەیان بەسەركردەوە.
بۆ زانیاریی زیاتر لە بارەی كار و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن و نوێترین هەواڵ و زانیاریتان بەدەست بگات، بەم ئەدرەسانەی خوارەوە:
https://twitter.com/SlemaniGov
https://www.linkedin.com/company/30141235/admin/
https://www.facebook.com/slemanigov/
https://www.instagram.com/slemani_governorate/
