به‌ مه‌به‌ستی به‌دواداچوون و كه‌مكردنه‌وه‌ی كێشه‌ی سووته‌مه‌نی لیژنه‌ی باڵای سووته‌مه‌نی شاری سلێمانی كۆبووه‌وه‌ و قائیمقامی سلێمانی ڕایگه‌یاند كارئاسانی ته‌واو ده‌كه‌ن بۆ ئه‌و كه‌س و كۆمپانیایانه‌ی بیانه‌وێت سووته‌مه‌نی هاورده‌ بكه‌ن.

ڕۆژی یه‌كشه‌ممه‌ 19.3.2017 ئاوات محمد قائیمقامی سلێمانی له‌ گه‌ڵ لیژنه‌ی باڵای سووته‌مه‌نی كۆبووه‌وه‌ و ڕایگه‌یاند: به‌دواداچوونمان بۆ كوالیتی سووته‌مه‌نی به‌رده‌وامه‌ و پشكنین بۆ هه‌موو گۆڕه‌پان و عه‌مباره‌كانی سووته‌مه‌نی ده‌كرێت به‌ مه‌به‌ستی دڵنیابوون له‌ كوالیتی ئه‌و سووته‌مه‌نیه‌ی دێته‌ ناو شار.

ده‌رباره‌ی ڕۆژانی نه‌ورۆز و گه‌شت و سه‌یران ووتی: پاڵاوگه‌ی گه‌ڕۆكمان بۆ ڕۆژانی نه‌ورۆز و وه‌رزی گه‌شت و سه‌یران ئاماده‌ كردووه‌ و به‌دواداچوون بۆ كوالیتی ئه‌و به‌نزینه‌ ده‌كه‌ین كه‌ دابه‌ش ده‌كرێت له‌ وێستگه‌كاندا و سه‌رپێچیكاران ڕووبه‌ڕووی سزای یاسایی ده‌كه‌ینه‌وه‌.

ئاوات محمد ئاماژه‌ی به‌وه‌ كرد كارئاسانی ته‌واو ده‌كه‌ن بۆ هاورده‌كردنی سووته‌مه‌نی له‌لایه‌ن ئه‌و كه‌س و كۆمپانیایانه‌ی كه‌ به‌ كوالیتی به‌رز و نرخی گونجاو سووته‌مه‌نی دابین ده‌كه‌ن.