نرخی كاره‌بای موه‌لیده‌ ئه‌هلییه‌كانی یه‌كه‌كانی نیشته‌جێبوون له‌ سلێمانی دیاری ده‌كرێت و له‌ به‌رژه‌وه‌ندی به‌شداربوان و خاوه‌نی یه‌كه‌كان ڕێكده‌خرێت، قائیمقامی سلێمانیش ده‌ڵێت هه‌ر یه‌كه‌یه‌كی نیشته‌جێبوون پابه‌ند نه‌بێت به‌و بڕیاره‌وه‌ ڕووبه‌ڕووی سزای یاسایی ده‌كرێته‌وه‌.

ئه‌مڕؤ دووشه‌ممه‌ 3.4.2017 ئاوات محمد قائیمقامی سلێمانی به‌ ئاماده‌بوونی سالار حسام الدین به‌ڕێوه‌به‌ری كاره‌بای سلێمانی له‌ گه‌ڵ لیژنه‌ هاوبه‌شه‌كان و لیژنه‌ی تایبه‌ت به‌ به‌دواداچوونی موه‌لیده‌ ئه‌هلییه‌كاندا كۆبویه‌وه‌ و پاش هه‌ڵسه‌نگاندن و به‌دواداچوون بۆ گرفته‌كانی یه‌كه‌كانی نیشته‌جێبوون نرخی كاره‌بای موه‌لیده‌ ئه‌هلییه‌كان به‌ پێ ی چه‌ند پێوه‌رێكی زانستی و میكانیكی دیاری كرا له‌ وانه‌ نرخی گازوایل و ریژه‌ی كاركردنی موه‌لیده‌ ئه‌هلییه‌كان، ده‌رباره‌ی ئه‌و بڕیاره‌ نوێیه‌ قائیمقامی سلێمانی ڕایگه‌یاند پێشتر یه‌كێك له‌ گرفته‌كانیان دۆزینه‌وه‌ی شێوازێك بووه‌ بۆ یه‌كلایی كردنه‌وه‌ی گرفتی نێوان به‌شداربووان و خاوه‌نه‌كانی یه‌كه‌كانی نیشته‌جێبوون به‌ڵام پاش هه‌ڵسه‌نگاندن و به‌دواداچوون له‌سه‌ر بنه‌مایه‌كی زانستی ئه‌و گرفته‌یان یه‌كلایی كرده‌وه‌ و له‌مه‌ودوا به‌ پێ ئه‌و بنه‌مایه‌ نرخ و پێدانی كاره‌با له‌ یه‌كه‌كانی نیشته‌جێبووندا دیاری ده‌كرێت.

ئاوات محمد ڕاشیگه‌یاند له‌ بڕیاره‌كه‌دا به‌رژه‌وه‌ندی به‌شداربووان و خاوه‌نی یه‌كه‌كانی نیشته‌جێبوون له‌به‌رچاو گیراوه‌ و پێویسته‌ هه‌ردوولا پابه‌ندبن پێوه‌ی، ڕاشیگه‌یاند: لیژنه‌ هاوبه‌شه‌كان به‌داواچوون بۆ چۆنیه‌تی جێبه‌جێكردن بڕیاره‌كه‌ ده‌كه‌ن و هه‌ر یه‌كه‌یه‌كی نیشته‌جێبوون پابه‌ند نه‌بێت پێوه‌ی ڕووبه‌ڕووی سزای یاسایی ده‌بێته‌وه‌.