قائیمقامی سلێمانی ڕایده‌گه‌یه‌نێت چاودێری ووردی ئه‌و گۆشتانه‌ ده‌كرێت كه‌ له‌ ڕێگه‌ی سه‌ربڕخانه‌كانه‌وه‌ ڕه‌وانه‌ی بازاره‌كانی شاری سلێمانی ده‌كرێت بۆ ئه‌وه‌ی له‌ ڕووی ته‌ندروستییه‌وه‌ دڵنیاببنه‌وه‌ و گۆشتێكی ته‌ندروست بگاته‌ ده‌ستی هاووڵاتیان.

ڕۆژی دووشه‌ممه‌ 24/4/2017 ئاوات محه‌مه‌د قائیمقامی سلێمانی له‌گه‌ڵ سه‌رپه‌رشتیارانی سه‌ربڕخانه‌ی سلێمانی و نوێنه‌ری گۆشت فرۆشه‌كان شاری سلێمانیدا كۆبووه‌ و به‌ ووردی به‌دواداچوون كرا بۆ شێوازی هێنان و هه‌ڵگرتنی ئه‌و گۆشتانه‌ی كه‌ ڕۆژانه‌ له‌ بازاره‌كانی سلێمانیدا ده‌فرۆشرێت.

قائیمقامی سلێمانی ڕایگه‌یاند بۆ ئه‌وه‌ی گۆشتێكی ته‌ندروست بگاته‌ ده‌ستی هاووڵاتیان پێویسته‌ به‌ شێوه‌یه‌كی زانستی چاودێری ئه‌و گۆشتانه‌ بكرێت كه‌ له‌ ڕێگه‌ی گوشتاركه‌ی سلێمانییه‌وه‌ ده‌گاته‌ ده‌ستی گۆشت فرۆشه‌كان ، هه‌ر له‌سه‌ربڕینی ئاژه‌ڵه‌كان و پاشان هه‌ڵگرتن و گواستنه‌وه‌یان.

ئاوات محه‌مه‌د ووتیشی : له‌مه‌ودوا چاودێری زیاتری ئه‌م لایه‌نه‌ ده‌كرێت و پێویسته‌ هه‌موو لایه‌ك له‌سه‌رپه‌رشتیارانی گوشتارگه‌كان و گۆشت فرۆشه‌كان مه‌رج و رێنماییه‌ ته‌ندروستیه‌كان له‌ ئاستێكی به‌رچاودا له‌به‌رچاو بگرن بۆ ئه‌وه‌ی گۆشتێكی ته‌ندروست بگاته‌ ده‌ستی هاووڵاتیان.

قائیمقامی سلێمانی ڕاشیگه‌یاند له‌ گه‌ڵ ئه‌م هه‌نگاوانه‌شدا ڕێگری ته‌واو ده‌كه‌ن له‌ قه‌ده‌غه‌كردنی ئه‌و گۆشتانه‌ی كه‌ له‌سه‌ر شه‌قامه‌كان به‌ پێچه‌وانه‌ی مه‌رج و رێنماییه‌ ته‌ندروستییه‌كان ده‌فرۆشرێت.