بەسەرپەرشتی سەرۆكایەتی شارەوانی سلێمانی مەیدانی نوێی ئاژەڵان لەسلێمانی دەگوێزرێتەوەو شوێنێكی گونجاوترو باشتری بۆ دابینكراوەو لەئێستادا كاركردن لەپرۆژەكەدا دەستیپێكردووەو خراوەتە بواری جێبەجێكردنەوەو وتەبێژی كۆمپانیای جێبەجێكاری پرۆژەكەش دەڵێت: كارەكانی پرۆژەكە زۆر بەباشی بەڕێوەدەچێت و بڕیارە پێش وادەی خۆی تەواوبكرێت. دیلان جەزا كەریم وتەبێژی كۆمپانیای مۆرتەر كەجێبەجێكاری پرۆژەكەیە بەسایتی پارێزگای سلێمانی راگەیاند: پرۆژەكە لەسەر رووبەری (80) هەشتا دۆنم زەوی لەگوندی یەخی ماڵی جێبەجێدەكرێت و ماوەی پرۆژەكە یەك ساڵەو بەسەرپەرشتی سەرۆكایەتی شارەوانی سلێمانی لە(15/3/2023)ەوە دەستمان پێكردووە، وتیشی: ئیشوكارەكانی پرۆژەكە زۆر بەباشی بەڕێوەدەچێت و بڕیارە پێش وادەی دیاریكراویش تەواوبكرێت. باسی لەوەشكرد، بودجەی پرۆژەكە (10.000.000.000) دە ملیار دینارە.
