- ڕۆژی 15ی تشرینی دووەمی ساڵی 1188ی زایینی، شاعیری جیهانی ئیسلامی (ئوسامەی كوڕی مونقز) كۆچی دوایی كردووە، كە یەكێك بووە لە پاڵەوانەكانی جەنگ لە دژی هێرشی خاچپەرستەكان و بێجگە لە كاری سەربازیی لە ماوەی ژیانیدا چەندین بەرهەمی ئەدەبیشی نوسیوە.
- ڕۆژی 15ی تشرینی دووەمی ساڵی 1498ی زایینی، شاژنە (ئیلیۆنۆرا هابسبۆرگ) پاشای پورتوگال و فەرەنسا لە دایك بووە كە حوكمڕانیی ناوچەیەكی بەرفراوانی خۆرئاوای ئەوروپای كردووە.
- ڕۆژی 15ی تشرینی دووەمی ساڵی 1795، هونەرمەندی شێوەكار و وێنەكێشی ناوداری فەرەنسی (شارل ئیمیدییە فیلیپ فان لۆ) كۆچی دوایی كردووە كە ڕۆڵی زۆری هەبووە لە پێشخستنی هونەری شێوەكاریی لە فەرەنسا و ئەوروپادا و لە پاش خۆی كۆمەڵێك بەرهەمی گرنگی بەجێهێشتوە.
- ڕۆژی 15ی تشرینی دووەمی ساڵی 1821، سوپای قاجارییەكان هێرشێكی گەورەیان كردە سەر ناوچەی ئەنادۆڵی خۆرهەڵات و گەمارۆی شاری بەغدادیان دا بە مەبەستی داگیركردنی كە لە ژێر دەستی عوسمانییەكاندا بوو.
- ڕۆژی 15ی تشرینی دووەمی ساڵی ساڵی 1889، سیستمی حوكمڕانی لە بەرازیل لەپاشایەتییەوە گۆڕدرا بۆ كۆماری و گۆڕانكاریی لە دەستووری ئەو وڵاتەدا كرا.
- ڕۆژی 15ی تشرینی دووەمی ساڵی 1908، (تسێ شی) ئیمپراتۆری چین كۆچی دوایی كردووە كە ژنێكی بە دەسەڵات بووە و لە ماوەی حوكمڕانییەكەیدا ڕۆڵی زۆری هەبووە لە فراوانكردنی دەسەڵاتی چینییەكان لە باشوری كیشوەری ئاسیا و خۆرهەڵاتی دووردا.
- ڕۆژی 15ی تشرینی دووەمی ساڵی 1920، ڕێكخراوی كۆمەڵەی گەلان یەكەم كۆبوونەوەی خۆیی لە شاری ژنێفی سویسرا دەست پێكرد، كە بە بەشداریی نوێنەری چەند وڵاتێكی جیهان بەڕێوەچوو.
- ڕۆژی 15ی تشرینی دووەمی ساڵی 1939، دوای دۆزینەوەی گۆڕی (توت عەنخ ئامون)ی فیرعەونی میسر گۆڕەكەی بە ڕووی جەماوەردا كرایەوە بۆ ئەوەی لە نزیكەوە بیبینن.
- ڕۆژی 15ی تشرینی دووەمی ساڵی 1943، (هاینریش هێملەر)ی سەركردەی ئەڵمانی بڕیاریدا قەرەجەكان بخرێنە ڕیزی جولەكەكانەوە و پێكەوە بخرێنە ئۆردوگاكانی دەستگیركردن بۆ ئەوەی لەناوببرێن.
- ڕۆژی 15ی تشرینی دووەمی ساڵی 1945، ڕٍێكخراوی نەتەوەیەكگرتووەكان بۆ پەروەردە و فێركردن و ڕۆشنبیری واتە (یونسكۆ) پێكهێنراوە كە یەكێكە لە لقە سەرەكییەكانی ڕێكخراوی نەتەوەیەكگرتووەكان و گرنگیی بە بوارەكانی منداڵان و فێركردن و كەلتور دەدات.
- ڕۆژی 15ی تشرینی دووەمی ساڵی 1961، تەلەفزیۆنی كوەیت بە شێوەیەكی ڕەسمی دەستی بە پەخشكردنی بەرنامەكانی كرد و سنوری پەخشەكەشی هەموو وڵاتەكەی گرتەوە.
- ڕۆژی 15ی تشرینی دووەمی ساڵی 1969، سەدان هەزار هاووڵاتیی ئەمریكی ڕژانە سەر شەقامەكانی شاری واشنتۆنی پایتەخت و خۆپیشاندانێكی ئاشتییان ئەنجامدا لە دژی جەنگی ڤێتنام و كوژرانی هاووڵاتیانی ڤێتنام و گەنجانی ئەمریكا خۆپیشاندانەكەش ناوی لێنرا (ڕێپێوان لە دژی مەرگ)، كە كاریگەریی لەسەر بڕیاربەدەستانی ئەمریكا هەبوو دواتر بوە هۆی كشانەوەی ئەمریكا لە خاكی ڤێتنام.
- دوای كۆتاییهاتنی جەنگی ئۆكتۆبەر لە نێوان میسر و ئیسرائیلدا، ڕۆژی 15ی تشرینی دووەمی ساڵی 1973، بە چاودێریی رێكخراوی خاچی سوری نێودەوڵەتی هەردوو حكومەتی قاهیرە و تەلئەبیب دیلەكانیان ئاڵوگۆڕ كرد.
- ڕۆژی 15ی تشرینی دووەمی ساڵی 1974، لەلایەن سەركردایەتیی شۆڕشی ئەیلولەوە لە باشوری كوردستان ڕێگایەكی تایبەت لە نێوان هەردوو ناوچەی بادینان و چۆماندا كرایەوە كە كارئاسانیی بۆ هاتوچۆ و پێكەوەبەستنی ئەو دوو ناوچەیە دەكرد.
- ڕۆژی 15ی تشرینی دووەمی ساڵی 1976، هێزەكانی بەرپەرچدانەوەی وڵاتانی عەرەبی چوونە ناو شاری بەیروتی پایتەختی لوبنانەوە بە مەبەستی ڕاگرتنی ئەو جەنگە ناوخۆییەی كە ماوەی ساڵێك بوو لە نێوان موسڵمان و مەسیحییەكانی لوبناندا هەڵگیرسابوو.
- ئێوارەی ڕۆژی 15ی تشرینی دووەمی ساڵی 1979، بۆ یەكەمجار و بە شێوەیەكی فەرمی ڕادیۆی دەنگی كوردستانی ئێران دەستی بە پەخشكردنی بەرنامەكانی كرد كە زمانحاڵی حزبی دیموكراتی كوردستانی ئێران بوو.
- ڕۆژی 15ی تشرینی دووەمی ساڵی 1988، ئەنجومەنی نیشتمانیی فەڵەستینی لە شاری جەزائیرەوە سەربەخۆیی دەوڵەتی فەڵەستینی ڕاگەیاند و حكومەتێكی لە تاراوگە بە سەرۆكایەتیی (یاسر عەرەفات) پێكهێنا.
- ڕۆژی 15ی تشرینی دووەمی ساڵی 1999، پێشمەرگە و تێكۆشەری گەلی كورد (محەمەد ئەمین مەعروف) كۆچی دوایی كردووە كە یەكێك بووە لە دامەزرێنەرانی پارتی دیموكراتی كوردستان و رۆڵی بینیوە لە خەباتكردنی گەلی كورددا لە دژی داگیركاران.
- ڕۆژی 15ی تشرینی دووەمی ساڵی 2001، كۆمپانیای مایكرۆسۆفت (ئێكس بۆكس)ی خستە بازاڕەكانی جیهانەوە وەكو یەكێك لە ئامێرەكانی یاریكردنی دیجیتاڵی.
- ڕۆژی 15ی تشرینی دووەمی ساڵی 2002، (هۆ جینتاو) وەكو سكرتێری گشتیی پارتی كۆمۆنیستی چین هەڵبژێردرا ئەوەش وەكو ئامادەكارییەك بۆ ئەوەی دواتر وەكو سەرۆكی كۆماری میللـیی چین دەستنیشان بكرێت.
- ڕۆژی 15ی تشرینی دووەمی ساڵی 2003، بە هۆی چەند تەقینەوەیەكەوە كە هەندێك شوێنی شاری ئیستانبوڵی توركیایان كردبووە ئامانج، ژمارەیەكی زۆر لە هاووڵاتیانی توركیا گیانیان لەدەستدا و چەندینی دیكەش بریندار بوون.
- ڕۆژی 15ی تشرینی دووەمی ساڵی 2003، (جەلال تاڵەبانی) سەرۆكی ئەنجومەنی حوكمی عێراق و (پۆڵا برێمەر) حاكمی مەدەنیی ئەمریكا لە عێراق واژۆیان لەسەر فیدراڵیی پارێزگاكانی عێراق كرد كە سەرەتایەك بوو بۆ چەسپاندنی سیستمی فیدراڵی لە عێراقی پاش ڕژێمی بەعسدا.
- ڕۆژی 15ی تشرینی دووەمی ساڵی 2006، تەلەفزیۆنی جەزیرە كەناڵێكی نوێی بە زمانی ئینگلیزی كردەوە و ناوی لێنرا (كەناڵی ئینگلیزیی جەزیرە).
- ئەمڕۆ لە فەڵستین یادی ڕاگەیاندنی دەوڵەتی سەربەخۆی فەڵەستین دەكرێتەوە، لە بەرازیلیش ئەمڕۆ جەژنی كۆمارییە و بۆنە و مەراسیمی جەماوەری بەڕێوەدەچێت، لە عێراقیش ئەمڕۆ بە ڕۆژی بەغداد ئەژمار دەكرێت.
