بەدواداچوونى مامەڵەكەت

ژمارەى نوسراوى پارێزگا

پن كۆد

ڕۆژی 25ی تشرینی دووەم


-    ڕۆژی 25ی تشرینی دووەمی ساڵی 311ی زایینی، پاپا (پوترسی یەكەم)ی پاپای كلێسای قیبتی ئەرسۆزۆكسی كۆچی دوایی كردووە، كە گەورەترین دەسەڵاتی پاپایی هەبووە لە ناو مەزهەبی ئەرسۆزۆكسدا.
-    ڕۆژی 25ی تشرینی دووەمی ساڵی 885ی زایینی، هێزەكانی فاكینگ دەستیان بە گەمارۆدانی شاری پاریسی فەرەنسا كرد بە مەبەستی داگیركردنی كە ماوەیەكی زۆر بوو بەرەنگاری هێرشەكان ببوەوە.
-    ڕۆژی 25ی تشرینی دووەمی ساڵی 1491، هێزەكانی وڵاتانی ئەوروپا گەمارۆیان خستە سەر شاری غەرناتە كە دوایین پێگەی موسڵمانەكان بوو لە ئەندەلوس، كە پاش تێپەڕبوونی ساڵێك ‌و لە هەمان ڕۆژدا پەیماننامەی ڕادەستكردنی شارەكە لەلایەن موسڵمانەكانەوە لەگەڵا (فردیناندی پێنجەم) مۆركرا بەو شێوەیەش كۆتایی بە دەسەڵاتی ئیسلامی هات لە ئەوروپا ‌و ئەندەلوسدا.
-    ڕۆژی 25ی تشرینی دووەمی ساڵی 1562، نوسەر ‌و شاعیر ‌و شانۆنامەنوسی ناوداری ئیسپانیا ‌و جیهان (لۆبی دی فیجا) لە دایك بووە كە ڕۆڵی زۆری هەبووە لە پێشخستنی ئەدەبی كلاسیكی لە ئیسپانیادا.
-    ڕۆژی 25ی تشرینی دووەمی ساڵی 1875، (خدێوی ئیسماعیل)ی فەرمانڕەوای میسر پشكەكانی میسری لە نۆكەندی سوێسدا فرۆشت بە حكومەتی بەریتانیا كە بە 170 هەزار پشك مەزەندە دەكرا.
-    ڕۆژی 25ی تشرینی دووەمی ساڵی 1903، بیرمەند ‌و نوسەر ‌و زانای ئایینی ئیسلام (ئەبوئەعلای مەودودی)ی هندستانی لە دایك بووە، كە شەرعناس ‌و ڕاڤەكارێكی گەورەی ئیسلام بووە ‌و چەندین بەرهەمی گرنگی لە بارەی فكری ئیسلامییەوە نوسیوە.
-    ڕۆژی 25ی تشرینی دووەمی ساڵی 1941، وەفدێكی باڵای كوردستانی خۆرهەڵات گەیشتنە شاری باكۆ لە یەكێتیی سۆڤێت ‌و لەگەڵا گەورە بەرپرسانی سۆڤێتدا تاووتوێی چەند پرسێكی گرنگیان كرد لە بارەی كێشەی كورد لە خۆرهەڵاتی كوردستان، وەفدەكەش ماوەی دە ڕۆژ مانەوە ‌و چەندین كۆبوونەوەی گرنگیان ئەنجامدا.
-    ڕۆژی 25ی تشرینی دووەمی ساڵی 1956، هێزەكانی سوپای هەرسێ‌ وڵاتی میسر ‌و ئوردن ‌و سوریا لە ژێر فەرماندەیی سوپای میسردا یەكیان گرت ‌و كرانە یەك هێزی یەكگرتوو لە دژی سوپای ئیسرائیل.
-    ڕۆژی 25ی تشرینی دووەمی ساڵی 1975، فەرەنسا دانی بە سەروەریی خاكی سۆرینامدا نا‌و بووە وڵاتێكی سەربەخۆ ‌و خاوەن سەروەریی ‌و دواتریش وەكو ئەندامی نەتەوەیەكگرتووەكان وەرگیرا.
-    ڕۆژی 25ی تشرینی دووەمی ساڵی 1976، سێهەم كاروانی وەجبەی دووەم لە پێشمەرگەكانی یەكێتیی نیشتمانیی كوردستان لە خاكی سوریاوە پەڕینەوە بۆ ناو خاكی باشوری كوردستان بە مەبەستی ئەنجامدانی چالاكیی شۆڕشگێڕانە ‌و هەڵگیرسانەوەی شۆڕش لە باشوری كوردستان دژی ڕژێمی بەعس.
-    ڕۆژی 25ی تشرینی دووەمی ساڵی 1981، حزبی دیموكراتی كوردستانی ئێران كۆنفرانسێكی گەورەی لە دۆڵی دیموكرات ئەنجامدا بە مەبەستی ئامادەكاریی بۆ كۆنگرەی حزب ‌و هەڵبژاردنی ئەندامانی بەشداربوو لە كۆنگرەی حزبەكەدا.
-    ڕۆژی 25ی تشرینی دووەمی ساڵی 1986، پردی (مەلیك فەهد) كرایەوە كە هەردوو وڵاتی عەرەبستانی سعودی ‌و بەحرەینی پێكەوە دەبەستەوە ‌و بۆ بوارەكانی بازرگانیی ‌و ئابوریی گرنگ بوو بۆ هەردوو وڵات.
-    ئێوارەی ڕۆژی 25ی تشرینی دووەمی ساڵی 1987، فڕۆكە جەنگییەكانی سوپای عێراق هەستان بە بۆردومانكردنی گوندی (ئەرماوان)ی سەر بە ناوچەی سەڵاحەدین كە بە هۆیەوە ژمارەیەك هاووڵاتی مەدەنیی كورد گیانیان لە دەست دا ‌و ژمارەیەكی دیكەش بریندار بوون زیانێكی زۆریش بە ناوچەكە گەیشت.
-    ڕۆژی 25ی تشرینی دووەمی ساڵی 1991، نوسەر ‌و سیاسەتمەدار ‌و ئەدیب ‌و پێشمەرگەی كورد مامۆستا (فەرەیدون عەلی ئەمین) كۆچی دوایی كردووە، كە لە ماوەی ژیانیدا خزمەتێكی زۆری بە ئەدەب ‌و فەرهەنگی كوردی كردوە.
-    ڕۆژی 25ی تشرینی دووەمی ساڵی 1992، بەرپرسانی چیكسلۆڤاكیا ڕێككەوتننامەیەكیان مۆر كرد بە مەبەستی دابەشكردنی چیكسلۆڤاكیا بۆ دوو وڵاتی جیاواز كە ئەوانیش چیك ‌و سلۆڤاك بوون، بەو مەرجەی پاش ڕەزامەندیی جەماوەر ‌و ئەنجامدانی ڕیفراندۆمەی گشتیی تێیاندا بڕیارەكە سەرەتای ساڵی 1993 بخرێتە بواری جێبەجێكردنەوە.
-    ڕۆژی 25ی تشرینی دووەمی ساڵی 1994، كۆنفرانسی كوردناسی كۆتایی بە كارەكانی هێنا كە لە شاری مۆسكۆی پایتەختی ڕوسیا بۆ ماوەی دوو ڕۆژ درێژەی هەبوو تێیدا چەندین توێژینەوە ‌و لێكۆڵینەوە لە بارەی كێشەی كوردەوە پێشكەش كران.
-    ڕۆژی 25ی تشرینی دووەمی ساڵی 1996، حكومەتی ئەمریكا بڕیاریدا پێنج هەزار هاوڵاتیی كوردی باشوری كوردستان ‌و خێزانەكانیان ببات بۆ دورگەی گوام ‌و دواتریش بۆ ناو خاكی ئەمریكا ئەوانیش پێكهاتبوون لەو كەسانەی كە پێشتر لەگەڵا ڕێكخراوەكانی ئەمریكادا كاریان كردبوو.
-    ڕۆژی 25ی تشرینی دووەمی ساڵی 2001، (ڕیاز ئەحمەد جەوهەر شاهی) كۆچی دوایی كردووە كە ڕابەری ڕۆحیی ‌و دامەزرێنەری بزوتنەوەی ڕۆحانیی جیهانی (ئەنجمەن سرفرۆشان ئیسلام) بووە.
-    ڕۆژی 25ی تشرینی دووەمی ساڵی 2011، موشیر (محەمەد حسێن تەنتاوی) سەرۆكی ئەنجومەنی باڵای هێزە چەكدارەكانی میسر كە دەسەڵاتی یەكەم بوو لە پاش ڕوخانی دەسەڵاتەكەی (حوسنی موبارەك)، دكتۆر (كەمال جنزوری)ی ڕاسپارد بۆ پێكهێنانی حكومەتێكی نوێ‌ لە میسردا.
-    ئەمڕۆ بە ڕۆژی جیهانیی نەهێشتنی توندوتیژی بەرامبەر بە ئافرەتان لە قەڵەم دەدرێت ‌و لەلایەن ڕێكخراوەكانی مافی مرۆڤ ‌و فیمینیستییەكان ‌و وڵاتانی جیهان ‌و كۆمەڵگەی نێودەوڵەتییەوە گرنگییەكی زۆری پێدەدرێت، كە ساڵی 1999 لەلایەن ڕێكخراوی نەتەوەیەكگرتووەكانەوە بە بڕیاری ژمارە 45\134 وەكو ڕۆژێكی جیهانی ناسێنراوە، لە سۆرینامیش ئەمڕۆ بە جەژنی سەربەخۆیی ئەژمار دەكرێت ‌و مەراسیم ‌و ئاهەنگی گەورەی نیشتمانیی بەو بۆنەیەوە بەڕێوەدەچن.


هه‌واڵی زیاتر